Nongpoh, Naitung 08: Ka Synjuk ki Rangbah Shnong Ri Bhoi District mynta ka sngi ki la leit ban kynduh syndon ïa u Deputy commissioner ka Ri Bhoi Distirct, u Abhilash Baranwal bad lha kane ka jingïakynduh ki la aiti ruh ïa ka Dorkhas ban pynsngew halor shibun ki mat ba la wan rah da ka Synjuk.
Ha kane ka jingleit kynduh ïa u Deputy Commissioner ka Ri Bhoi la ïalam da u Chaiman katei ka Synjuk, u Bah B.B Makdoh bad u Secretary u Bah P.B Sylliang bad la synrang lang da ki dkhot kane ka Synjuk.
Ki mat ba la wan rah da ka Synjuk ki Rangbah Shnong Ri Bhoi District hakhmat u Deputy Commissioner ki kynthup ïa ka jingpan por ban link ïa ki Aadhar Card bad ruh ïa ka ration card ba hap ban leh online ba bun ki paidbah ki shem jingeh, kaba ar ban dawa pynlait noh ïa ka Bill Material ka skhim MGNREGS, kaba lai ban shna noh ïa ki surok ïaid kjat (Foot Over Bridge) ba la mang haduh 7 tylli ha ka surokbah National Highway-6 ha Ri Bhoi bad kaba saw ka long ban ai da ka jingtip kaba thikna halor ka jingthung ïa ki VDP ha man la ki shnong.
Kumba la pynpaw da u Bah P.B Sylliang, ka synjuk ka sngewkmen ban ïa kynduh ïa u Deputy Commissioner ka Ri Bhoi ban ïoh lad ban pynsgnew halor kitei ki mat kiba dei na ka bynta ka bha ka miat ki paidbah ha Ri Bhoi bad ha kajuh ka por ruh na ka liang u Deputy Commissioner ka Ri Bhoi , u la kular ban shim halor kitei ki mat ba kongsan ba la wan rah da ka synjuk.
