Shillong, Nailar 30 : Ka sorkar jylla ka la pan por saw taïew ban peit bniah halor ka jingpan jaka shuh jong ka Harijan Panchayat Committee (HPC). Ïa kane ka la mat la rah bishar ha kane ka sngi Balang da ka Meghalaya High Court.
Na ka liang ka Ïing Bishar ka la pynpaw ïa ka jinglyngoh halor ka jingpynslem ban pynbeit ïa kane ka ishu kaba ïadei bad ka jingtyrwa pynkynriah noh ïa kitei ki 342 tylli ki longïing na Them ïewmawlong.
“Kane ka kam ym pat lah ban pynbeit wat hadien ka jingïakren hapdeng ka sorkar jylla bad ki nongujor,” ong ka Division Bench haka Order hadien ka jingbishar ïa ka jingujor ba la phah da ka Jylla bad ka HPC.
“U Advocate General u la pyntip ba ka sorkar ka dang pyrkhat ïa ka jingkyrpad da ki nongujor ban ai jaka shuh. Na bynta kane ka kam, ka sorkar jylla ka la kyrpad ban ai por sa saw taïew,” ka la ong.
Ka sien bishar biang halor katei ka bynta kan long biang ha ka 29tarik Nailur.
Ha ka hukum kaba la pyllait kham hashwa, ka Ïing Bishar ka la ong ba ïa kane ka ishu ka la neh la slem bha.
Dei ha ka 07tarik Jylliew, ka Ïing Bishar ha ka Order ka la pyntip ba u Advocate General ba ka Harijan Panchayat Committte ka la mynjur ha ka jingïakren ia ka blueprint ba la pynkhreh da ka sorkar hynrei ka la kdew pat katto katne ki jingpynbeit halor katto katne ki bynta.
Halor kane, naka liang u Symbud Myntri Rangbah ba peit ïa ka tnad Urban Affairs u la ong ba ka sorkar jylla ka kloi ban ïa kren bad ka HPC halor ka jingkyrpad jong ki ban pynbeit ïa ka blueprint, kaba dei na kabynta ban pynkynriah noh ïa ki 342 tylli ki longïing na Themïewmawlong sha ka jaka ba mynta jong ka Shillong Municipal Board.
Hynrei u la ong pat ba lada katei ka jingpynbeit ba la pan da ka HPC kam dei satia kaba ïahap kumta na ka liang ka sorkar kin ym mynjur.
Ka sorkar jylla ka la wanrah da ka blueprint hadien ba ka la kyntait ïa ka jingtyrwa kaba 25tarik Ïaiong, 2022 jong ka HPC ba ka jaka ba 200 square meter dei ban ai sha man ki 342 tylli ki longïing hapoh ka jaka ba hap ha ka European Ward nalor ban pynlut ïa ka jinglut na ka bynta ban shna ïa ki ïing ki sem jong ki.
Ha ka 31tarik Nailar, 2022 pat ka sorkar jylla ka la pynbna ïa ka rai jong ka ban pynsha ïa ki ïing ha ka jaka ba heh 2.5 akar kaba dei ka jaka jong ka Shillong Municipal Board ban pynkynriah ïa kitei ki 342 tylli ki longïing.
