Shillong, Jymmang 22 : Ka la don ka jingsaphriang jong ki dur ha ki rynsan social media kiba pyni ïa ka jingsatah bad ka jingper ki jaboh jabaiñ ha ka dam Ganol kaba don ha West Garo Hills district.
Hynrei, halor kane na ka liang u Myntri ka tnad Bording AT Mondal u la pyntip ba kane ka jingpoi lut ki jaboh jabaiñ ha katei ka dam kaba ju pynmih bording, kadei kaba ju jia man ka por bad kam dei satia kaba dang jia tang mynta.
Haba kren bad ki lad pathai khubor u Myntri u la pyntpi ruh ba ka tnad ka la bthah ïa u Deputy Commissioner ban shimkhia halor kane ka bynta bad ruh ban phah pynkhuid mardor.
“Kane ka jinglang ki jaboh jabaiñ kam dei satia ba don kiba leit thoh ha ka dam hynrei kadei ba ki tuid na ki bynta ba shaneng na ka daw ka jingjur u slap bad kumta ka tan lut ha ka lynti ïaid tad haduh ban da poi lang sha Ganol,” ong u Myntri.
Shuh shuh u la ïathuh ruh ba u la dep ban ïa kren bad u Deputy Commissioner ban phah pynkhuid noh mardor ha kaba la pyntip ïa u ba ka jingpynkhuid kan sdang noh ha kane ka step sngi Thohdieng.
U Myntri u la pyntip ruh ba ki bor pynïaid distrik kin sa leit ruh ban pynshai sha ki paidbah ba kim dei satïa ban bret ia ki jaboh jabaiñ ha ki rud jong ka wah namar ha ka por ba jur u slap ki tuid lut sha ka wah bad nangtei pat ki lang ha ka dam Ganol.
