Saphriang ki khubor ba poi Delhi ka jingpynbor ïa ki MDC Congress ban weng na ka jingïatrei lang bad ka NPP

Shillong, Nohprah 08 : Ka jingpynbor ïa ki MDC Congress ba kin weng noh ïa ka jingïatrei lang na ka Executive Committee ba ïalam da ka National People’s Party (NPP) ha KHADC ka la poi haduh u pud ba la phriang ki khubor ba kane ka ishu ka la poi syndon shaduh ki nongïalam jong ka Congress ha Delhi.
Kumban shu kdew hangne, ka Congress ka don arngut ki MDC, ba kynthup ïa u MDC ka Mawkhar-Pynthor-umkhrah Bah Pynshngaiñ N Syiem ba bat ruh ïa ka shuki Deputy Chief Executive Member (DyCEM) bad u Bah Ronnie V Lyngdoh MLA/MDC ka Mylliem constituency.
Ki tyllong khubor ki ïathuh ba kane ka jingpynbor ïa kitei ki MDC ban weng noh na ka jingïatrei lang bad ka EC ba ïalam da ka NPP ka la neh la slem bha bad dei na kane ka daw ki nongïalam ka party ki la thoh syndon shaduh u Secretary ka All India Congress Committee (AICC) ba dei peit ïa ka Jylla Meghalaya, u Chella Kumar.
La ïathuh ruh ba kane ka jingdawa ka la sdang naduh u Nailur 2024 ha ka jingïalang paidbah jong ka party kaba long ha Congress Bhavan la shaniah ha kine ki MDC ban weng noh ïa ka jingïatrei lang tangba kam shym la don kano kano ka jingkylla haduh mynta mynne.
Nalorkata, la ïathuh ba dei na kane ka daw ba ki nongïalam ka party na ki District Congress Committee (DCC) ha ka taiew ba khatduh jong u Naiwieng ki la thoh syndon sha ki nongïalam ka party ha Delhi ban phah tuklar lang halor kane ka bynta.
La sngewthuh ruh ba ka jingkwah jong ka Congress ban weng noh na ka EC ka long ba kan ym don kano kano ka jingïadei bad ka party NPP, ha shwa ba kin leit sha ka jingjied thymmai ïa ki MDC ha kane ka samoi ban wan.
Ki khubor ki ïathuh ruh ba mardor na ka AICC ruh ki la wan sha kane ka jylla ha ka taiew ba nyngkong jong u Nohprah ban kynduh ïa ki nongïalam ka party kynthup naduh ki Block Congress, District Congress bad ruh haduh ka Meghalaya Pradesh Congress Committee ban ïa kren kham bniah halor kane ka ishu.
La ïoh jingtip ruh ba ha kane ka sien ruh ki nongïalam ka party ki la kyntu ïa ki nongïalam ba dei peit ïa ka Meghalaya ba kin shimkhia bha ïa kane ka bynta khnang ban lah pynbeit noh kham kloi ba kan ym ktah pat ïa ka elekshon MDC kaba la khmih lynti ba kan long ha u Rymphang – Lber jong u snem ban wan.
Kumta, kane ka ishu mynta la ïoh jingtip ba kan don biang ka jingpynbor ïa kine ki arngut ki MDC ban shim ïa ka rai kaba khatduh ha kine ki khyndiat sngi ban wan, kata ba kin weng noh kham kloi na ka jingïatrei lang bad ka Executive Committee ba ïalam da ka NPP.
Na ka liang u Mawphor um shym la ïoh satia ban pyntikna na ki nongïalam ka party la kane ka jingphriang ki shithi ba ki phah sha ka AICC kadei ne em ka jingshisha.