Santosh Trophy 2024-25:Pynliem ka M’laya ïa ka Nagaland, bteng ïa ka jingjop ba ar sien lynter

Shillong, Naiwieng 22: Ka Meghalaya ka la kham jan ban ïohrung sha ka wat ïakhun ba khadduh (final round) jong ka Senior Men’s National Football Championship na ka bynta ka Santosh Trophy 2024-25 da kaba pynliem noh ïa ka Nagaland da 3-0 kol ha ka jingïakhun kaba ar jong ka Group E ha Nalbari, Assam ha ka sngi Thohdieng.
Haba phaidien, ka kynhun ïalehkai jong ka Meghalaya ka la lah ha ka ban pynliem ïa ka Arunachal Pradesh ha ka jingïalehkai kaba nyngkong ha ka sngi Balang bad kumta kan dang bteng ban lamkhmat ha ka kyrdan ba nyngkong na kane ka Group da kaba khur 6 poiñ bad sah sa kawei ka jingïalehkai ban pyndep.
Haba phai sha ka jingïalehkai, u Donlad Diengdoh (21′) u la pynkhih ïa ka kol kaba nyngkong na bynta ka Meghalaya shuwa ba u kapten ka kynhun – u Fullmoon Mukhim (26′) un pynbud ïa ka kol kaba ar hadien san minit.
Ki coach jong baroh arliang ki la ïakylla ïa la ki player jong ki hashwa ba u Fairming Suting, uwei na ki rangïalehkai uba la mih bujli (substitute) jong ka Meghalaya, u la pynthikna khlem jingartatien ban khur ïa ka jingjop da kaba thep ïa ka kol ha ka minit kaba 87.
Na bynta kane ka jingïalehkai, u coach ka Meghalaya u Bah Hering Shangpliang u la pynkylla tang ïa u wei na ka thup ki player ïalehkai ki ban ïoh sdang, da kaba wanrah ïa u Robertson Khongriah ha ka jaka jong u Badondor Marbaniang.
Ar sngi kham mynshuwa, ka Nagaland ka la pynliem ïa ka Assam bad ha ka sngi Thohdieng ka Assam ka la pynliem ïa ka Arunachal da 4-0 kol. Kane kamut ba ka Meghalaya kan nym lah ban kheiñ sting ïa ka Assam ynda ka ïakynduh pyrshah la sngi U Blei.
Lada ka Assam ka pynliem ïa ka Meghalaya bad ka Nagaland kan pynliem ïa ka Arunachal kin don lai tylli ki kynhun ki ban ïaryngkat mar 6 point. Hynrei, ka Meghalaya ka donkam tang ban ïakhaid bad ka Assam ban pynthikna ïa ka kyrdan ba nyngkong na ka Group E. Kumba la kdew, ba tang ka kynhun kaba wan hakhliehduh na ka group kan ïohrung sha ka wat ïakhun kaba bud ha kane ka lympung Santosh Trophy.
Ki rangïalehkai ba ka Meghalaya ka pynïalehkai hynne ka sngi ki long:
Siwel Rymbai (GK), Overkindness L Mawnai, Arlangky Nongsiej, Donborlang Nongkynrih, Wanboklang Lyngkhoi, Aibiangmame Nongneng, Kevin Rymbai (sub Fairming Suting 63′), Robertson Khongriah (sub Aenam Jyrwa 90’+4), Fullmoon Mukhim (sub Dibormi Kassar 90’+4), Damanbhalang Chyne (sub Baiaikara Swer 76′), Donlad Diengdoh (sub Khrawkupar Jana 63′)