Sam u CM ïa ki cheque jong ka skhim Payment for Ecosystem Services ban pynjyrngam ïa ka mariang

Shillong, Jylliew 6: U Myntri Rangbah ka Jylla Conrad K Sangma mynta ka sngi Ba-ar, ula sam ïa ki cheque sha ki Nongïalam Shnong bad ki riew shimet ka Ri-lum Khasi, Jaintia bad Ri-Bhoi District kaba dei jong ka skhim Payment for Ecosystem Services (PES) kaba hap hapoh ka Green Meghalaya Mission ne ka mission ban pynjyrngam ia ka mariang ha Meghalaya.
Ka Payment for Ecosystem Services (PES) ka dei ka skhim kaba ïarap song pisa sha ki Shnong ki thaw, ki Kur bad ki riew shimet kiba mih ban pynneh pynsah bad pynrben ïa ki khlaw ki btap kiba don ha Jylla Meghalaya.
Ia kine ki cheque la sam kum shibynta jong ka jingrakhe World Environment Day, 2023 hapoh ka Jylla.
U Myntri Rangbah ka Jylla ula ïashimbynta ruh ha ka jingrakhe ïa kane ka sngi pynneh mariang hapoh Nongbah Shillong ha ryngkat bad ki samla pule, ki Dorbar Shnong bad ki kynhun bapher bapher.
U Conrad haba kynthoh hapoh ka Twitter ula ong “ Ka thong jong ka jingïada bad sumar ïa ka mei mariang jong ngi ka ïaid tawiar bad ka jingpyrshang jong baroh ki riew shimet ha ka ban wanrah ïa ka jingkylla. Ka Meghalaya ka la sakhi ïa ka jingkhih paidbah bala iasnohkti lang da ki Shnong ki Thaw ban leh eiei ha ki kyrdan bapher bapher ha ka ban wanrah biang ïa ka jingitynnad bad jingkhuid jong ka Jylla jong ngi”.