Shillong, Nailar : Ka Ramakrishna Mission ka la pynlong ka jingïalang sam khusnam sha ki nongjop ha ka “48th Annual Cultural Competition” ba la pynlong ha ka 20 tarik Nailar ha Ramakrishna Mission Vivekananda Cultural Centre, Quinton Road, Shillong ha kaba kila don haduh 214 ngut kiba la jop ïa ki khusnam na ki jaka pule bapher bapher kiba don ha nongbah Shillong bad ki jaka ba marjan.
Ka Ramakrishna Mission, Shillong ka la pynlong ïa kane ka jingïakhun mynta la 48 snem na ka bynta kito kiba don sap ki phong kiba kyrpang, ka rynsan ban pyni ïa kane ka sap. Ki la don palat 2 hajar ngut ki briew kiba la pynrung kyrteng na ki 47 tylli ki jaka pule kiba don hapoh bad hajan kane ka nongbah bad kumba 1500 ngut ki khynnah pule ki la ïashim bynta ha kane ka jingïakop.
U kongsan ha katei ka sngi, u dei u Bah Rudi Warjri, Ambassador ba la shongthait na ka kam, uba ha ka jingkren ula ai ka jingïaroh ïa kane ka centre kaba la lah ban pynlong ïa kum kane ka jingïakhun kaba heh bha bad kaba la kynjoh sha ka 48 snem mynta.
U la ong ba ka jingim kaba khuid ka long kaba khlaiñ bha ha India ha ka por ba ka dang khlaiñ ka jingsynshar ki mynder ïa ka ri bad kane ka long namar u Swami Vivekananda.
U Swami Sama chittanandaji Maharaj, uba long u President ka Ramakrishna Mission, Singapore u la ai jingkren ha kane ka sngi ha kaba u la batai shaphang ka jingdonkam jong ka niam, ka jingïadei hapdeng ki briew, ka jingnang jingstad bad ka kolshor ha ka jingim jong ki briew. U la ong ruh ba ka long kaba donkam ban nang ïa la ka ktien tynrai ha ryngkat ka ktien phareng. Ka ktien tynrai ka dei kaba ngi nang la ka nang, kaba pyni ïa ki dak jong ka kolshor bad ka dei ruh ka ktien ba ngi pyndonkam ban ïakren bad u Blei.
Hashuwa kane, u Swami Hitakamanandaji Maharaj u la pdiang burom ïa baroh kiba la wan ïashim bynta ha kane ka prokram sam khusnam bad u Swami Divyaswarupananda Maharaj u la ai ka jingkren sngewnguh.
