Sam bai luksan sam ka sorkar Assam ia ki nongtih dewïong ba iap, sahkut na jingtwa ka krem Umrangso

Guwahati, K’Lyngkot 18 : Ka sorkar Assma ha ka sngi Saitjain ka la sam ïa ka bai luksan (cheque) sha ki longiing jong ki lanot ba khlad bad kumjuh kiba dang jah na ka jingshlei um ha ki krem dewiong ha Umrangso dang shen watla ka jingtan ïa ka um na kitei ki krem ka dang bteng.
Ïa kane ka bai luksan la sam da u Myntri ka tnad Mines and Mineral jong ka sorkar Assam u Kaushik Rai, kata da mar 10 lak sha ki bahaiing jong ki saw ngut ki lanot kiba laïoh ban sei ïa ka met jong ki. Katba na bynta ki bahaiing jong ki san ngut ki nongtih dewiong kiba haduh mynta ym pat lah sei na katei ka jaka, na ka liang ka sorkar ka la ai mar 6 lak da kaba bynta ba ïa ka song pisa kaba sah yn sa pyllait biang hadien.
Katei ka par dewiong ha Kalamati kaba don ha ka thain Umrangso ha Dima Hasao District ka la shlei um ha ka 06tarik Kyllalyngkot hadien ba ka la kiew kynsan ka um kaba la poi haduh u pud ba 09 ngut ki briew ki la sahkut hapoh. Na kine la ong ba saw tylli ki met ïap laïoh ban sei noh katba ïa kiwei pat haduh mynta ka jingwad ka dang ïai bteng.
Halor kane na ka liang ka Kynhun Myntri ha ka sngi Palei kala pynbna ba yn ai haduh 10 lak tyngka ka bai luksan sha ki bahaiing jong kitei ki nongtih dewiong kynthup ïa kito kiba la ïoh sei ïa ka met bad kumjuh ïa kiba ym pat lap.
Ïa kane ka 10 lak, 6 lak kadei kaba la ai na ka Assam Chief Minister’s Relief Fund bad ïa ka 4 lak pat la ai na ka Assam State Disaster Management Authority.
Haba kren ha kane ka jingïalang kaba long ha Umrangso, u Myntri ka tnad u la phah ruh ka jingsngewlem ha kyrteng jong u Myntri Rangbah ka Jylla sha baroh ki bahaiing hasem jong kitei ki lanot.
“Ka dei ka jingjia kaba sngewsynei bha ba kum kine ki jingjia ba sngewsih ki jia kiba poi haduh u pud ban duh ei ki mynsiem briew. Watla ïa ka mynsiem briew ym lah ban pynshongdor hynrei kane ka bailuksan kaba ngi ai mynta ka sngi ka long kum ka dak ban kyrshan ïa kito ki bahahiing ha sem jong ki,” u la ong.
U Myntri u la pyntip ruh ba ka jingtan ïa ka um na katei ka par ka dang ïai bteng bad ong ruh ba man ka sngi ki tan kumba 1 klur litar.