Shillong, Jymmang 22: Ka State Level Inter School Athletic Meet 2025 kaba lai sngi lynter ha Sports Authority of India centre ha NEHU, kaba la poi sha kaba kut ha ka sngi Palei (22 tarik Jymmang, 2025) ka la sakhi ïa ki katto katne ki rekod meet kiba thymmai ba la buh da ki khynnah shynrang bad kynthei ha ki jingïalehkai bapher bapher.
Ha ka U-18 ki kynthei, ka Sibilda Maring (Ri-Bhoi) ka la lah ban kynthih 1.49 mitar ha ka high jump, katba ka Melibad Kro (9.99m) jong ka EKH ka la duna tang khyndiat ban kynjoh 10 mitar ha ka shot put. Ka kynhun mareh jong ka EKH ba kynthup ïa ka Pringchi R Marak, Sonalin Sohbar, Juliana Mary Llyngshiang bad ka Rudeimaia Pakem ki la pyndep ban mareh ïa ka 4x100m relay hapoh 55.19 sekon.
Ha ka U-18 ki shynrang, u Cherim Ch Sangma (NGH) u la lah ban rynsied 6.31 mitar ha ka long jump, katba ka kynhun mareh jong ka EKH ba kynthup ïa u Bettingstar Ch Sangma, Chanmiki Suting, Jovian Z Mawrie bad u Henry Yoga Sangma ki la pyndep ban mareh ïa ka 4x100m relay hapoh 44.90 sekon.
Ki don ruh ar tylli ki rekod ba la pynpra ha ka U-16 jong ki kynthei. Ka Leryang G Marak (SGH) ka la lah ban kawang 9.38 mitar ha ka shot put, katba ka Cheamingname R Marak (NGH) ka la pyndep hapoh 46.39 sekon ban pyndep ïa ka jingïakop mareh kaba 300 mitar.
Hadien lai sngi ka kynhun ïalehkai jong ka East Khasi Hills ka la long ka lahduh ne ka Overall Champions.
ïa kane ka lympung ïalehkai la pynlong da ka tnad Sports ryngkat ka jingïatreilang bad ka Meghalaya Athletics Association, ha kane ka lympung ïakop la sakhi ïa ki 48 tylli ki jait jingïalehkai ha track bad ha madan, ha kaba palat 780 ngut ki nongïalehkai na ki 12 tylli ki district ki la ïashim bynta ha ki kyrdan bapher bapher, katkum ka rta jong ki.
Ka East Khasi Hills ka la ïoh ïa ka nam lahduh hadien ba khur 23 tylli ki takma ksiar, 11 tylli ki rupa bad 8 tylli ki rnong. Ka North Garo Hills ka la wan ba-ar hadien ba ïalehkai bha ha ka sngi ba khatduh, da kaba khur 6 tylli ki takma ksiar, 5 tylli rupa bad 4 tylli rnong, bud sa ka East Jaintia Hills ha ka kyrdan balai (6 tylli ksiar, 2 tylli rupa, 4 tylli rnong). Ha ka kyrdan ba saw la ïoh da ka South Garo Hills (4 tylli ksiar, 4 tylli rupa, 2 tylli rnong), katba ka Ri-Bhoi (3 tylli ksiar, 4 tylli rupa, 5 tylli rnong) ka la wan ha ka kyrdan ba san.
Ka West Jaintia Hills ka la pyndep hadien ïa ka EKH haba kheiñ kyllum ïa jingïoh khur bun ki takma hynrei kam shym la lah ban khur palat ïa kawei ka takma ksiar (kawei ka takma ksiar, 10 tylli rupa bad 10 tylli ki rnong).
Ka EKH ka la long ka kynhun kaba kynsai tam lane ‘Best Team’ ha baroh ki kyrdan jong ki shynrang bad kynthei, katba ka EJH ka la long ba-ar (runners-up) ha ka liang ki shynrang, bad ka NGH ha ka liang ki kynthei.
Ki nongïalehkai ka EKH ki la khur lut ïa ki khusnam shimet ha ka kyrdan U-16 bad U-18 ha kaba ïa ka nam Best Athlete la khur da u Saidul Ali (U-16 boys), ka Rukini RT Dkhar (U-16 girls), u Henry Yoga Sangma (U-18 boys) bad ka Pringchi R Marak (U-18 girls). U Rikangku D Sangma jong ka South Garo Hills bad ka Akangesa A Sangma jong ka West Garo Hills ki la khur ïa ka khusnam Best Athlete ha ka kyrdan U-14 napdeng ki shynrang bad kynthei.
Ki riew pawkhmat kiba la don lang ka sngi pynhap pyrda ki long u Myntri ka tnad Pule Puthi u Rakkam Sangma, u Director jong ka Directorate of Sports & Youth Affairs u DD Shira bad Additional Director PB War Nongbri, u Assistant Director K Passah, lem bad kiwei kiwei.
