Mawkyrwat, Jymmang 23: Ka Evergreen Sports Club ka la khur ïa ka nam jop pyrshah ïa ka Ryntiehlang Football Club ha ka lympung ïalehkai kynjatbol ba la tip kum ka Golden Jubilee Celebration Football Tournament 2024 – 2025 ba la pynïaid da ka Nonglang Sports Club ha madan Pyndenïew-lyngdoh, Nonglang, South West Khasi Hills District.
Lah ban kdew ba ka jingkhur jong ka Evergreen Sports Club ïa ka nam jop ka dei hadien ba ka la ïoh ban thep da 3 – 2 kol pyrshah ïa ka Ryntiehlang Football Club ha ka jingïakhun.
Haba phai sha kane ka jingïalehkai, kaba dei ha ka kylla step ba ka Evergreen Sports Club ka la ïoh ban pynkhih ïa ka shi kol lyngba u Donlad Diengdoh ha ka minit kaba 18.
Katba haba wan phai pat sa ha ka jingïalehkai jong ka kylla miet pat ka Evergreen Sports Club ka la ïoh ban pynjlan ïa ka jinglamkhmat da kaba thep sa ar tylli ki kol ban pynskhem ïa ka jinngjop, kawei na u Fullmoon Mukhim (51’min) bad kawei pat ha ka minit kaba 73 ba la thep da u Donlad Diengdoh.
Ym tang kata, ka Ryntiehlang Football Club ruh da ka jingïakhun kaba tyngeh ka la ïoh ïpynphai ar kol lyngba u Macdonal Lyngkhoi (67’), bad na u Morning Khongkieng (85’).
Ha kaba kut jong ka jingïalehkai la ïoh ban sam ïa ka khunsnam sha ka Evergreen Sports Club ka kynhun kaba jop kata da ka khusnam ryngkat ka song pisa kaba T. 1 lak 30 hajar bad sha ka Ryntiehlang Football Club kaba wan ba ar da ka khusnam ryngkat ka song pisa kaba T. 70 hajar. Shuh shuh la sam ruh ïa ki khusnam shimet ki kynthup ïa u Fullmoon Mukhim uba ïoh ïa ka nam kum u ‘rangïalehkai ba kynsai, u Donlad Diengdoh uba ïoh ïa ka nam ba tbit, u Manbha Iawphniaw kum u nongthep buh kol (4 kol marwei), bad u Paul Lyngdoh kum u nongapkol ba tbit.
Ha kane ka sngi pynhap pyrda ïa ka Golden Jubilee Celebration Football Tournament 2024-’25 la pynshit pynshngaiñ da ki jingrwai bad jingshad na ki khynnah skul ha ryngkat ka jingdonlang naduh u kongsan u bah Renikton Lyngdoh Tongkhar uba dei u MLA ka Mawkyrwat Constituency bad u bah Kynpham V. Kharlyngdoh kum u symbud kongsan ryngkat ruh ki nongshah khot sngewbha, ki paidbah nongpeit phutbol bad kiwei de.
