Shillong, Risaw 07: U Bah P.T Sawkmie, MLA barim u ong sa tang lada khang ïa ka Mawlai marten yn sa kyndit ka Shillong shano kin theh ñiut, namar la ïohi ha kine ki sngi haba don ka hearing ne ka jingïalang paidbah ban shim rai baroh ki shnong ki ïa pyrshah lut bad ki ong ba kim kwah ba ka shnong jong ki kan long kum ka marten ha Mawlai.
“Ka long kaei kaei kaba sngewpangnud pangmet bad sngewsynei ia ka shnong Mawlai namar ym don mano mano ban shim lem ïa ka jingkitkhlieh ban ong ba ka shnong jong ngi ka kloi ban shah ïa ka jaka theh ñiut kumba long ka Mawlai kaba la shah shitom da ki phew tylli ki snem,” ong u Bah Sawkmie.
“Da ki phew snem ka Mawlai marten ka la long ka jaka theh ñiut, ki paidbah kiba shong marjan ki la mad ïa ka jingsma iwtung, wat ki shnong kiba marjan kumjuh kiba ïaid lynti surok bah, haduh kine ki sngi kiba mynta ki mad ïa ka jingsma wat lada ki la khang ïa ka ïit kali jong ki ruh,” bynrap u Bah Sawkmie.
U ong ruh, “Kaba nga sheptieng ka long ba lada ki paidbah Mawlai ki la ngiah ka sma iwtung bad ap shi ap ym don ba sngewlem mano mano ha kata ka por kin ong dei ban khang noh ïa ka Marten bad yn ym shah theh ñiut shuh.”
