Sa tang ban khyllem ka jingkieng ha Wahlyngdoh Maweit, 500 tylli ki trok kit dewïong ñiom man ka sngi

Nongstoiñ, Nohprah, 19: Ka jingkieng Dieng (BUG Bridge) kaba don ha ka shnong Wah lyngdoh (21st km na Nongstoiñ, kan tikna ban sa hap noh shapoh ha kano kano ka por, namar, nalor ba ka la tlor lypa naduh kine ki bnai lyiur ba la dep, sa ka jingtwa na ka jingtih ïa ka foundation ban shna thymmai ïa katei ka jingkieng, ong u Bah T.Tyrsa Adviser jong ka Synjuk ki Nongsynshar Shnong Maweit Area.
U la ong ba halor katei ka jingartatien ba kan sa hap, ka Synjuk ki Nongsynshar shnong Maweit Area (SNSMA), ha ka jingïalang kaba la ïa shong naduh u bnai Risaw 2024, ka la leit ai ka jingthoh kyrpad ha u D.C. bad la ai copy ruh sha u SP Nongstoiñ, kaba dt. 5th Oct 2024, ban kyrpad ïa u ban pynsangeh noh shuwa ïa ki trok kit dieng, khamtam ïa ki trok kit dewiong, da kaba pynjari syndon da ka aiñ 144 Cr pc. Hynrei, sngewsih haduh mynta ym shym don ba sngap na ka liang ki bor District.
Ka long kaei kaei kaba nang I shyrkhei shuh shuh ha kine ki bnai tlang mynta lei lei, namar ka jingïañiom ki trok kit dewiong, kit dieng ki la long shaba palat, ym duna ïa ka 400 bad 500 tylli man ka sngi bad I tieng shisha namar kawei ka trok ki ju kit kumba 13 ne 14 ton.
Lada katei ka jingkieng kan hap, ka jingjynjar ne jingduhnong kaba khraw kan long ïa ki 35 ne 40 tylli ki shnong kiba don sharum jong katei ka jingkieng bad tikna kan sa kut noh syndon ka leit ka wan jong ki paidbah, namar ka dei ka jaka kaba khim bad ym don jaka naei naei ruh ban kiar ne shna Subway. Ka jingïa bud laiñ shilynnter ki trok dewiong, ka long ruh ka jingwit ne pynthud kaba khraw ïa ka Company shna surok, namar ki machine ne kiwei pat ki kor shna surok la shu lut por tang ban kynrïah ïa ki trok ba man ka sngi.
Ka long ruh kaei kaei kaba sngew lyngngoh haba ïohi ne ïoh jingtip lyngba ki Media/Youtube, ba ka High Court Meghalaya, ka la pyrkhing tyngeh kumno ban khanglad ïa ka jing khaïi be-aiñ ïa u dewiong hapoh ka jylla. Hynrei kumba ka long hapoh ka District WKH ka long mar khongpong.
La ïohi ruh lyngba ki media, katno ka jingbunkam ka High Court Meghalaya ban khang lad ïa ki kam khaïi dewiong be-aiñ hapoh ka Jylla, kat haduh ban da buh kyrpang da ka Committee naduh mynshuwa, ka “Kateki Committee” ba la khlieh da u retd. HC Justice.
Hynrei, wat la katei ka ïing bishar kaba don burom ka trei shitom ruh, kam ju sei soh namar na ka liang ka sorkar MDA-2, ka la nang ïai len man ka sngi bad wat hapoh Assembly ruh khlem don kano kano ka jingsngew kum ka sorkar ba ïalam ïa ki paidbah.
Shuh shuh kane ka sorkar, kam don kano kano ka jinglehraiñ ïa ki paidbah kiba ïaid lynti man ka sngi lyngba ka Highway Nongstoiñ-Shillong, Nongstoiñ- Riangdo Hahim ïa kaba ki trok kit dewiong be-aiñ (khlem challan), kiba ïa ieng laiñ da ki phew tylli ban ap ïa ka por mynmiet, ban cross ïa kitei ki Gate bad ynda mynstep pat baroh ki la ïa lait lut, ka pyni, ba ym shym la don kawei ruh ka trok kaba kit be-aiñ.
Ban ïoh rieh tngen jong ka sorkar MDA-I, mynshuwa ka la pynmih kawei ka jingpynbna, ba ong, “yn ai award Rs 5000/- ïa uno uno u ba wan shakhmat ban ai report ïa kiba trei dewiong be-aiñ”. Halor katei ka order, ka sorkar ka la tip lypa ba yn ym don ba nud ban wan sha khmat, namar I don jingma ha kane ka juk High-label haba ïa nujor bad ka san hajar kan long aiu bad ka jingim. Kumta katei ka kam ka long tang kum ka kynja syrngiew (ordinance) rieh tngen.
Ki bym sngew lah shah shuh ban ïai shah, ka la mih ka sur paidbah kynthup ki Nongsynshar shnong, ki longkmie ki longkpa, ki samla pule baroh jong ka thaiñ, ba la dei ka por ban kheiñ duh bad ïaleh pyrshah noh katba jia katba long, na ka bynta ka jingim ka jaidbynriew ka thaiñ.
Ka sur paidbah naduh u ba rit ba ria ka ju sawa ruh man ka sngi, ban kylli, shaei ki sengbhalang, ki seng saiñ pyrthei kiba trei hok ïa ka jaidbynriew ne paradoh para snam ki jah, ym don ba kren ne ïada lem ïa ki jingshah ñiom beiñ, shah lute be-aiñ ïa ka spah mariang hapoh kane ka thaiñ kaba ym don aiñ sorkar.