Shillong, Naitung 27 : U Myntri ka tnat Bording ka sorkar jylla u Abu Taher Mondal hynne ka sngi u la leit ban jurip bad ki heh ophisar halor ki kam baroh kiba la pyntrei ban pynbha ne ka Dam Rehabilitation & Improvement Projects (DRIP) ha jingkieng Umïam ha ka sngi Thohdieng, 2024. Ha shwa kane ka jingjurip, u Myntri u la pynlong ka jingïalang khmih bniah ban ïasyllok ïa ka jingïaid jong ki kam ha katei ka jingkieng. Ha ka jingïalang la shim bynta da u Sanjay Goyal, IAS, Commissioner & Secretary ka Power Department bad Chairman-cum-Managing Director jong ka Meghalaya Energy Corporation Limited (MeECL), u Bah Bloomingstar Wahlang, Director Generation MePGCL bad kiwei part ki heh sorkar na ka MeECL. Ki ophisar na ka ITD Cementation bad kiwei.
U Myntri u la pynpaw ka jingkyrmen kaba pura ba haba kut une u bnai yn lah ban plie noh bad u la ong ba ka high-power committee kan ïakynduh ha ka sngi Nyngkong ban pynbeit ïa ka sngi bad tarik ban plie noh. Ha ka jingïalang yn donlang ruh consultant na IIT Guwahati, Director General of Police, PWD official, bad ki bor pynïaid district ki ban mihkhmat na East Khasi Hills bad Ri Bhoi district.
U Myntri u la pynpaw ruh ïa ka jingdonkam ban pyndep pura noh ïa ki kam ba dangsah bad ban pynthikna ïa ki lad jingïada bad ka jingneh slem jong kane ka jingkieng dam. Lah ban pynkynmaw ba kine ki kam la pyntrei hapoh ka Dam Rehabilitation & Improvement Projects (DRIP Phase II & III) kaba la sdang naduh ka 14 tarik u Nohprah, 2023. Ka jingthmu ba kongsan jong ka DRIP ka long ban sumar bad ban pynbha ïa ki dam.
