Sa shibnai pynjlan ka MePDCL ïa ka skhim OTS ban ïoh siew dep ki riew paidbah ïa ka bai bording

Shillong, Lber 31: Ka Meghalaya Power Distribution Corporation Limited (MePDCL) kala pynbna ba kan pynjlan ïa ka jingpyntreikam ïa ka skhim One-Time Settlement (OTS) 2025 sa shi bnai, ban plie lad ïa ki nongthang bording ba kin ïoh ïa ka por ban siew dep ïa ka bai bording kaba dang sahteng ka jong ki.
Ka MePDCL kala buh ïaka tarik kaba khatduh ban pyntreikam ïa ka skhim OTS ka dei haduh ka 31 tarik u Lber 2025 bad mynta la pynjlan ïa kane ka skhim haduh 30 tarik u Iaiong 2025.
ïa katei ka rai la shim hadien ba kila don bun bha ki briew kiba la ïashimbynta ha katei ka skhim naduh ba la sdang pyntreikam ïa ka, da u Myntri Rangbah ka jylla u Conrad K. Sangma ha ryngkat bad u Myntri ka tnad Bording u AT Mondal ha ka 4 tarik u Lber 2025.
Ka MePDCL kala pynwandur ïa ka OTS Scheme 2025 ban pynsting ïa ka jingkhia jong ka jingsiew ïa ki nongshim ïa ka bording kiba hap ha ka Domestic bad BPL kaba ka long hapoh jongka 5KW bad kiba la shah ot noh ka bording namar ka jingbym siew ïa ka bai bording.
Hapoh jong kane ka scheme, ki nongshim bording ki lah ban shim ïa ka 100% Waiver halor ka Delay Payment Surcharge (DPC) ne ka jingslem ban siew pyndep ïa ka bai bording bad ki lah ban jied ban siew shisien siew ne ban siew da ka Installment kaba khlem donkam shuh ban siew ïa ka ram.
Kila don baroh 12,262 ngut ki nongshim bording kiba la pynrung kyrteng haduh mynta bad ka pisa kaba ki dei ban siew ka long 15.97 Klur tyngka ha kaba 11.13 Klur tyngka ka dei ka dor trai bad 4.84 Klur tygnka kadei kaba la dep ban map noh.
Ka jingpynjlan ïa kane ka OTS Scheme 2025 haduh ka 30 tarik u Iaiong 2025, ka long ban ailad ïa ki nongshim bording ba kin ïoh siew pyndep ïa ka bai bording kaba dang sahteng bad ban kiar na ka jinghap ban siew ïa ka jingshah daiñ kuna.
Ha ka kyrwoh khubor, ka MePDCL kala kyntu jur ïa baroh ki nongshim bording ba kin shimkabu ïa katei ka jingpynjlan ïa ka scheme bad ban siew pyndep noh ïa ka bai bording ka jongki kiba long ha ki kyndon kiba biang.
Ban ïashimbynta ha katei ka skhim, ki nongshim bording ki lah ban leit ha ka ophis jong ka MePDCL kaba don hajan lane ban phone ha u Toll-Free Number 1912 ban ïoh ïa ki jingtip kiba bniah bad ban pynrung kyrteng ïalade.