Shillong, Naiwieng, 11: U Steve Jyrwa uba la ïohrah ïa ka nam lahduh ha ka India’s Best Dancer ha ka sngi u Blei mynta ka kynti u la hap ban pynkhreh pat ïalade ban ïakhun sa ha ka rynsan ïakob shad Super Dancer.
U President jong ka All Meghalaya Dancers Assocation (AMDA) Bah Kitbok Thabah ha ka jingïakren bad ki lad pathai khubor u la pynpaw ka jingsngewkmen halor ka jingjop jong u Steve Jyrwa ha ka rynsan ïakob India’s Best Dancer kaba la rah ïa ka nam ka burom ïa ka nongbah Shillong bad ka Jylla Meghalaya baroh kawei hakhmat ka ri India.
Ka nam jong ka nongbah Shillong bad ka Jylla Meghalaya ka la paw biang hadien 14 snem, kata hadien ba ka kynhun rwai jong ka Shillong Chamber Choir ka la ïohrah ïa ka nam lahduh ha ka India’s Got Talent, Season 2 ha u bnai Risaw, 2010.
U President jong ka AMDA ha ka jingïakren bad ki lad pathai khubor ha ka Lah Sngi u Blei u la ai khublei ïa ki paidbah nongshong shnong jong ka Jylla, ïa ka Sorkar Jylla, ïa u Myntri Rangbah ka Jylla Conrad K. Sangma, ïa u Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem bad ïa u MLA ka Pynthorumkhrah u Bah Alexander L. Hek kynthup ruh ïa ka Kong Bibi Jyrwa ka kmie jong u Steve bad ïa ki kynhun bapher bapher.
U Bah Thabah u la ïathuh ba u Steve un ym pat lah satia ban wan phai sha la ïing namarba mynta un dang hap ban pynkhreh ïalade ban ïashim bynta sa ha ka rynsan ïakob Super Dancer bad u la ïathuh ruh ba ka seng kan sa pyntip paidbah ïa ka tarik halor ka jingwan phai jong u Steve sha nongbah Shillong.
