Sa ka restaurant ha Lumbyrhing, pynïar ka dukan Pyrda Saw ba bna nam ha Nongpoh
![](https://mawphor.com/wp-content/uploads/2022/05/mawphor-1-1.jpg)
Nongpoh, Risaw, 22: Ka dukan ja ba bna nam ha ka thaiñ Nongpoh kaba bun ki paidbah ki ju tip kum ka dukan Pyrda Saw, kala lah ban pyniar ïaka shnat treikam jong ka sa da ka Restaurant harud surok bah National Highway 6 haka shnong Lumbyrhing ha Ri Bhoi.
Ïa katei ka jaka bam bala ai kyrteng kum. Ka Green Hills Restaurant la long trai da u Bah Kmenson Syngkli bad ka Kong Ridalin Warjri ba la wan ban plie paidbah ïaka da u Bah D. Kharkongor, Elder jong ka Balang U Khrist Nongpoh ha ka jingdon ryngkat kiwei kiwei de ki nongialam Balang, ki bahaing hasem bad ki paralok parajor.
Ha shwa ka jingplie ïa katei ka jaka bam la pynlong ruh daka jingïaseng lyngkot bad ka jingduwai kyrpang ban kyrkhu kyrdoh bad ka jingai mynsiem ïa ki trai ba kin lah ban ai ia ka jingshakri kaba paka sha ki paidbah nongleit nongwan ha kaba ïadei bad ka bam khamtam ka jingkyrkhu jong u Blei ba u la plie lad ïaki ba kin dang lah ban pynïar ïaka jaka bam.
Katei ka Reataurant ka don haki ar bynta ka rukom bam naka bynta kiba bam doh (Non-veg) bad ki bym bam doh (veg), bad yn sdang ban plie paidbah ïaka naduh ka 23 tarik mynta u bnai.