Sa 66 klur pan ka PHE ban pyndep noh ïa ka projek GSWSS Phase-III

Shillong, Nailur 26 : Ka tnad Public Health Engineering (PHE) ka la pan shuh sa 66 klur tyngka na ka bynta ban pyndep ïa ka projek umbam umdih kaba la ap khmih lynti la slem bha kaba tip kum ka Greater Shillong Water Supply Scheme (GSWSS) Phase – 3.
Haba pyntip ïa kane, u Myntri ka tnad PHE, u Marcuise N Marak u la pyntip ba ïa katei ka projek ka la kiew dor biang na ka daw ka jingpynslem ban pyndep naduh u snem 2008.
“Ngi la pan shuh sa 66 klur tyngka ban pyndap ïa ka jingnang kiew dor bad ïa kane yn hap ban pynmih da ka sorkar jylla,” u la ong haba bynrap ba ïa katei ka projek la mang kumba 300 klur tyngka ban pyntreikam.
Na ka liang u Myntri u la pyntp ruh ba ïa ka GSWSS – 3 ka la sahteng na ka daw kiba bun kynthup naduh ka jingduna pisa.
“La mang ban pyntrei naduh u snem 2008. Ha ka por ba la mang, mardor ngi la khot tender bad la aiti ïa ka kam. La dep ban pyllait ïa ka pisa ha ka kylla ba nynkgong bad hadien ki jingpyllait pisa ki la sahteng noh na ka daw ka jingpynslem jong ka sorkar pdeng nalor ba ka don noh ka jingkylla ha ka jingbat ïa ka kam, dei na kata ka daw ka ka sahteng bad slem ban pyndep,” u la ong.
Shuh shuh u ong ruh ba kawei pat ka daw jong ka jingslem kadei namar ka PHE ka khlem ïoh jingbit na ka Public Works Department (PWD) ban pynïaid ïa ki pipe na ka bynta ban pynpoi um sha ki 12 tylli ki zone ha ka nongbah Shillong baroh kawei.
“Ngi la dep khot tender bad na ki 12 tylli ki zone, baroh ki pipe ki hap ban ïaid lyngba ka surok PWD ha kaba na ka liang ka tnad kam ai jingbit kloi ban ïoh pynïaid noh ïa ki na surok. Ha kane ka khep ruh shibun ka por ka la bam bud pat sa ka jingbit na ka tnad Forest kaba hangne ruh ka slem bha ter ter sa ha ka Cantonment Board kaba shim por bha ban ïoh jingbit.”
Nalorkata, u Myntri u la ïathuh ruh ba ka jingbym lah jong ka tnad ban ïoh jingbit na ka Hima Mawphlang ban tei ïa ka pumping station ha ka jaka kaba jan bad ka wah Umïew ka la dei ka dawbah ka jingslem ban pyndep ïa ka GSWSS – 3.
Hynrei u pyntip pat ba ka tnad ka la khmih lynti ba ka Hima Mawphlang kan sa ai noh ïa ka jingbit la kumno kumno ha ka taïew ban wan.
“Lada ngi ïoh ïa ka jingbit, ngi khmih lynti ba ngin lah ban pyndep noh ïa ka GSWSS – 3 ha u Nohprah mynta u snem,” ong u Myntri da kaba bynrap ba ïa ka jingbit ban tei ïa ka pumping station ban tan ïa ka um na katei ka wah Umiew sha ka jaka pynlang (reservior) bad nangtei pat sha ka Treatment Plant.”
Haba ïadei pat bad ka jingpynïaid ïa ki pipe, u Myntri ula pyntip ruh ba ka PHE Department kam ïoh satia ban pyntrei ha ka por mynsngi na ka daw ka jingthut ka ïaid ka ieng ki kali ha nongbah Shillong.
“Lada ka tnad ka ïoh ban trei ha ka por mynsngi, hap ban pynsangeh ïa ka ïaid ka ieng ki kali. Kumta ka tnad hadien ba ka la ïoh jingbit, ngi hap ban trei tang ha ka por mynmiet. Dei na kine ki daw baroh ba ka shimpor,” u la ong.