Ryngkat u MLA ka thain, leit peit u CM ïa ka jingshna ïa ka madan artificial turf ha Ladjaplem

Amlarem, Naiwieng 11 : U Myntri Rangbah ka Jylla Conrad K Sangma, ha ka sngi Nyngkong, u la leit ban jurip ïa ka jingshna ïa ka madan Artificial Turf ha ka shnong Ladjaplem kaba don ha Amlarem bad pynpaw ïa ka jinghun ïa ka jingïaid stet ka jingpyntrei ïa kane ka projek.
La synran ïa u Myntri Rangbah da u MLA ka thain bad Myntri ka Tnad Pule Puthi Bah Lahkmen Rymbui lem bad ki Ophisar ka Tnad Sports, u District Sports Officer (DSO) ka West Jaintia Hills Bah Khroobok Passah lem bad ki dkhot ka Amlarem Sub-Divisional Sports Association (ASSA).
Ha kane ka jingjurip, u Myntri Rangbah u la ai ka jingïaroh ïa ka rukom shna bad rukom pynwandur ïa ka madan phutbol haba pynpaw ba kum kine ki madan ïalehkai la shna ruh ha kylleng ka Jylla hapoh ka prokram ka sorkar ban kyntiew ïa ki kam ïalehkai.
Shuh shuh u la pynpaw ïa ka jingkyrmen ba ka project kan sa dep noh shen bad kan ai ka lad ïa ki samla ka Amlarem bad ki jaka ba marjan ba kin kilan met ïalade bad ïashimbynta ha ki lympung ïalehkai ki ban sa pynbeit ha ka thain.
U Myntri Rangbah ula ban jur ruh ïa ka jingkut jingmut jong ka sorkar ban pynshlur ïa ki kam ïalehkai, ban kyntiew ïa ki samla bad pynïadonbynta ïa ki shnong ki thaw, haba ban jur ba kum kine ki jaka ïalehkai kin saindur ïa ki sap bad pynkhlain ïa ki kam ïalehkai ha ka thain.