Shillong, Nailar : Ka ïai Shai Sngi Village Organization (VO) ha ka sngi Saitjaiñ ba la lah ka la ïoh ban rakhe ïa ka jingdap shisnem ka jong ka jingïalang kaba la long ha phyllaw jong ka skul shnong Madan Mawkhar ha ka jingdon ryngkat u MLA ka Mawlai u Bah PT Sawkmie kum u kongsan, u rangbah shnong bah P. Khymdeit bad kiwei kiwei.
Shi bynta ban pyniphuh iphieng ïa kane ka sngi, na ka liang ki dkhot ka Self Help Group (SHG) ki la pynlong ïa ka jingshad khasi tynrai, ïa ki jingrwai bad pynlong ruh ïa ki drama lyngkot kiba don jingmut.
Ha katei ka sngi la ïoh ruh ïa ka jingrwai na u samla Blesstar Nongbet uba la jop ïa ka Meghalaya Got talent Seoson 3 bad na ka Sunmisha Nongbet kaba dang shu jop shen ïa ka jingïakob rwai ha ka Seoson 6 jong ka Meghalaya Got Talent.
Ha katei ka sngi ki u bah PT Sawkmie bad ki dkhot ka Iai Shai Sngi ki la ot ruh ïa u cake kum shi bynta ban lehkmen ïa ka jingdap shisnem ka ïai Shai Sngi.
Haba ai jingkren u bah Process u la pynpaw ïa ka jingsngewkmen bad jingsngewnguh ïa U Blei ba ka Iai shai VO ka la ïoh ban rakhe ïa ka jingdap shi snem ka jong ka, kaba dap ha ka sngi U Blei shisnem pura hynrei la rakhe noh ïa ka ha ka sngi Saitjaiñ ba la lah.
U pyrto ïa ka ïai Shai Sngi wat hapdeng bun ki jingeh bad ki jingkiew jinghiar ha ka jingïaid lynti jong ka, hynrei ka la ïaineh haduh ban da ïoh rakhe ïa ka jingdap shisnem.
“Kum u MLA nga kitbok bad kyrkhu kyrdoh ïa baroh ki SHG kiba don ha Madan Mawkhar bad kiwei de ba kin nangïai kiew ha ki kam jong ki,” ong u Bah Process.
Shuh shuh na ka liang u MLA u la kyntu ruh ïa ki 6 tylli ki SHG kiba don ha Mawkhar ba kin ïai long barabor kiba ïa tylli bad kiba trei minit bad kiba treihok ïa ka kam.
Ha kane ka sngi u la noh synñiang ruh ïa ka song pisa, ka duli, ki shuki bad ka miej na ka bynta ka jingdonkam jong ki SHG.
