Shillong, Nailar 18 : U Symbud Myntri Rangbah ka jylla ha ka sngi Palei u la pynbna ba ka sorkar Meghalaya Democratic Alliance ka la weng noh ïa ka rai ba la pynjari da ka sorkar barim ha u 2014 kaba la khang pyndonkam ïa ki sboh dawai ba ju pyndonkam da ki paidbah ha ka rep ka riang.
Haba pynbna ïa kane, u Bah Prestone u la ong ba ïa katei ka rai ki la shim ha ka jingïalang kaba long hynne ka sngi bad u Myntri Rangbah ka jylla, Conrad K Sangma.
Shwa kane, u Symbud Myntri Rangbah u la ïa kynduh ruh bad ka Farmer’s Cell jong ka East Khasi kaba ïalam da u Bah Kansing Lyngshiang kiba la leit ban pynsngew ïa shibun ki jingeh ba ki nongrep ki kynduh naduh ba ka sorkar ka khang ïa ki sboh dawai ha u 2014.
“Ngi la pyntip sha ki ba ngi la shim ïa ka rai ba ïa ka subsidy na ka liang ka sorkar kan ai 50 persen, kata lada ka dor ka sboh dawai kadei 500 tyngka ka sorkar kan ai 250 tyngka bad ki nongrep kin siew 250 tyngka,” u la ong da kaba bynrap ba ïa katei ka jingpynbna kin sa pynmih noh ha ka taiew ban wan haba ïadei bad kitei ki dawai sboh.
U Bah Prestone u la pyntip ruh ba ïa kitei ki dawai kin sa pynpoi lyngba ka MECOFED. Katkum ka jingong jong u, katei ka rai kaba ki shim kadei namar ki ïohi ba ka rep ka riang katba nang ïaid ki snem ka la nang hiar naduh ba khang ïa ki sboh dawai ban pynshlur pat ïa ka kam rep khlem dawai ne mission organic.
“Ngi ong ïa ki nongrep ba watla ngi la shah ban pyndonkam ïa ki dawai sboh hynrei ngi kwah ruh ban ong ba lada lah ki dei ruh ban pyrshang ban pyndonkam da ki sboh ba ki pynmih hi katkum ka buit ka bor ha ka jaka ban pyndonkam da kitei ki jait sboh ba don ki chemical,” la bynrap biang u Symbud Myntri Rangbah.
La pynshai ruh ba lada ïa kren beit tang shaphang kata ka rep khlem dawai, kum ka sorkar ka hap ruh ban peit ruh haba ka jingpynmih ïa ki mar rep pat ka hiar haduh 40 ne 50 persen. “Kaei ka lawei jong ki nongrep namar kane ruh ka ktah ïa ka ïoh ka kot jong ka jylla baroh kawei.”
Shwa kane, u Myntri ka tnad ka Rep ka Riang, Bah Banteidor Lyngdoh ruh u la lum ïa ka jingïalang bad ki ophisar ka tnad ryngkat ki nongrep ban ïakren halor katei ka ishu dawai sboh kaba ki nongrep na ka por sha ka por ki ju ud ba ka la ktah palat ïa ka jingpynmih ïa ki mar rep.
