Shillong, Nohprah 03 : Ka Malki Sports Club ka la ïoh ban khur ïa ka khusnam ryngkat ka song pisa kaba 2 Lak tyngka hadien ba ka la ïoh ban khur ïa ka nam lahduh ha ka lympung ïalehkai First Division jong ka Shillong Sports Association – 2024 kaba la pynlong ha madan ïalehkai SSA ha madan First Ground, Polo, ha kane ka sngi Ba-ar.
Kane ka League ka la kut ha ka 28tarik u Naiwieng hadien ka jingïakhun da ka round robin. Kumba long ha ka Shillong Premier League, ym shym la don satia ki jingïalehkai playoffs – kumta, kano kano ka kynhun kaba ïoh ban don ha khlieh duh jong ka miej kheiñ poiñ hadien ki jingïakhun ha ka round robin ka kylla long ka kynhun ba rah ïa ka nam lahduh.
Ka Malki ka la pynkut ïa la lympung da kaba jop hynñiew sien bad shah rem ar sien, bad kamai 21 poiñ baroh. Ka kynhun ba wan ha ka kyrdan ba-ar ka dei ka Mylliem SC, kaba la khur 18 poiñ na ki 6 sien jop bad lai sien rem, bad baroh ar tylli ki kynhun kin kiew sha ka Shillong Premier League ha u snem 2025.
Mynta, ka kynti ka Malki kan ïoh biang ban leit phai sha ka SPL hadien ba ka la shah pynhiar kyrdan noh na ka SPL ha kaba kut jong u snem 2022.
Haba phai pat sha ka kynhun ïalehkai jong ka Mylliem, kane ka kynhun ka la ïoh ban khur ïa ka khusnam ryngkat ka song pisa kaba 1 Lak tyngka kum ka kynhun ba wan ba -ar ha ka lympung. Kane ka khusnam pisa mynta u snem ka la kham heh lada nujor bad kaba long ha u snem ba ladep naba ka SSA ka buh thong ban kyntiew ïaka rukom ïalehkai ha katei ka lympung ïalehkai kaba dei kyrpang na ka bynta ki samla ka jylla.
Nalor kitei ki khusnam bad song pisa, ka la don ruh ka khusnam shimet ïa kaba la sam sha u rangïalehkai ba ïoh thep bun kol eh ha ka First Division ïa kaba laïoh da u Wallambha Kharpran jong ka Sohryngkham SC uba la ïoh ban thep haduh 9 kol. Hynrei jïa ryngkat pat ba u nongthep kol ba ïoh thep bun eh u dei pat na ka kynhun kaban shah pynhiar kyrdan noh.
Ha kane ka lympung ka Sohryngkham ka wan ha ka kyrda kaba ar na trai, da kaba don hajrong tang shi kyrdan ïa ka Umphyrnai SC. Kine baroh ar tylli ki klob kin ïalehkai ha ka thup Second Division ha ka samoi ban wan.
La pynshongkun ïa kane ka prokram da ka jingdonlang ki nongïalam jong ka SSA hapoh ka jingïalam jong u Bah Robert Dkhar ba dei u Working President jong ka SSA.
Na ka liang ka Association ka shim ruh ïa katei ka kabu ban pynkup burom ïa ki refree ba ka jylla ka pynmih kata u Bah Kynsanphar Lyngdoh Nongum uba la shah jied ha ka AIFF Elite Panel of Referees.
La pynkup burom ruh ïa ka kynhun SSA -14 bad SSA U-16 bad kumjuh ïa ki nongïarap jong ka kynhun kiba la shim bynta ha ka Meghalaya Youth League dang shen mynta u snem. Ka kynhun U-16 jong ki shynrang ka la ïoh ban khur ïa ka nam lahduh katba ka kynhun U-14 pat ki la poi haduh ka semi final.
