Shillong, Nailar, 25: U Myntri barim ka Sorkar Jylla bad uba la long teng haduh lai samoi kynthih kum u MLA jong ka Rangsakona u Adolf Lu Hitler Marak ha ka sngi Palei u la pynïasoh ïalade bad ka All India Trinamool Congress (AITC) ryngkat lang bad u Vice President braim ka BJP -Meghalaya, u David Ch Marak lem bad u Joint Director barim ka tnat Pule Puthi u Bhupendra G Momin.
Ïa kine ki lai ngut la pdiang burom da u Zenith Sangma ha ryngkat ka jingïadonlang jong u Lazarus Sangma lem bad ki MDC ha ka jingïalang kaba la long ha Tura.
U Zenith haba kren ha kane ka jingïalang u la ong ba kin dang bun shuh shuh sa kiwei pat ki ban sa wan pynïasoh sha ka AITC ha kine ki sngi ki ban dang wan namarba ki la angnud ban ïohi ïa ka jingkylla ha ki snem ki ban sa wan.
“U (Adolf Lu Hitler) la long u nongmihkmat jong ki paidbah bad u la shakri ruh ïa ka Jylla. U la long u Myntri ka Sorkar Jylla mynba u la mihkhmat kum u MLA na ka Rangsakona Constituency kaba la mihkhmat da ma nga mynta,” ong u Zenith.
U la bynrap ruh ba u Adolf Lu Hitler u la pynïasoh sha ka AITC khlem da buh ïa kino kino ki kyndon namarba u kwah ban ïatreilang ha kaba wanrah ïa ki kam pynroi ha ka jylla.
U Hitler haba kren ha kane ka jingïalang u la ong ba ïa ka Sorkar bathymmai yn sa ïalam da ka TMC bad kum u nongïalam ba la tbit uba la mihkhmat teng ïa ki paidbah ka rilum Garo un sa nang ïarap shuh shuh ïa ka party ha ki sngi bad ki snem ki ban dang wan.
U Zenith Sangma u la pyntip ruh ba ka AITC kan sa pynieng 60 Seat ha ka elekshon ka ban sa long ha u snem 2023.
