Rung semi final ka MIMHANS, Meghalaya Home Guards, AG Meghalaya FT bad ka MeECL

Shillong, Nailur 12: Ka lympung ïalehkai futsal kaba la tip da ka Big FM’s Big Futsal Fest ka la jam sha ka wat ïakhun semi final ha kaba saw tylli ki kynhun ba dang sah ba kynthup ïa ka MIMHANS, Home Guards, AG Office bad ka MeECL ki la jop ïa ki jingïakhun quarterfinal.
U rangïalehkai barim ha ka lympung I-League, u Sheen Sohktung ryngkat bad u Chanmitre Thma ki la ïoh ban pynkhihjar mar ar kol na bynta ka AG Meghalaya FT kaba la ïarap ïa ka kynhun ban pynliem ïa ka ITI Shillong da 6-1 kol.
Katba ha kawei pat ka jingïakhun, ka kynhun u Aiborlang Khongjee – kata ka Assembly FC ka la shah pynliem noh ha ka MIMHANS da 6-4 kol. Kane ka kynhun ka la lah ban ktah ïa ka mynsiem ki nongpeit da ka rukom lehkai kaba i shongkun, ba la mih madan da ki dkhot nongtrei ka MIMHANS.
U Brandon Dkhar u la long u namtam na bynta ka MIMHANS, da kaba ïarap ïa ka kynhun ban khyrwit ruh ïa ka hat-trick kaba ar jong u ha kane ka lympung.
Katba ha ka jingïakhun hapdeng ka MeECL pyrshah ïa ka PHE FT, la sakhi ïa ka jingtrei shitom jong u Ebormi Buam u ba la lah ban pynkhih haduh 5 kol ban ïarap ïa ka MeECL ban khur ïaka jingjop da 9-4 kol. Ha ka jingïakhun kaba khadduh la sakhi biang ïa ka jinglah ban lehkai bha u Fivestar Shylla u ba la thep marwei baroh saw kol na bynta ka Meghalaya Secretariat Home Guards ban jop da 4-3 kol ïa ka Water Resources. Hadien ba u la thep phra kol ha ka jingïakhun ba ladep, u Fivestar u long mynta u player ba lamkhmat ha ka jingbun kol.
Lah ban kdew ba ka jingïakhun semi final kan long kaba itynnat shuh shuh, ha kaba ka AG Meghalaya kan ïakynduh pyrshah ïa ka MeECL. Ha kawei pat ka semi final ka MIMHANS kan aireng pyrshah ïa ka Home Guards. Ki jingïakhun na bynta ka semi final yn pynlong mynta ka sngi ha ka por 2 baje nohphaisngi.