Nongpoh, Nailur 18: Ka kynhun Blue Bombers FC kala rung syndon sha ka thup phainal jong ka lympung ïalehkai Knock-Out Football Tournament bala pynlong da ka Ri Khasi Social and Cultural Sports Club ha madan Kurkalang hadien ba kala lah ban pynliem noh ïaka Galaxy FC haka Semi-Final ba nyngkong.
Haba phai sha ka jingïakhun semi final ha kate ka sngi hapdeng ka Blue Bombers pyrshah ïaka Galaxy FC ka jingïakhun kala long shisha kaba itynnad bad kaba shongshit naduh ka kylla step bala wan ruh ban sakhi da ki hajar ngut ki paidbah nongpeitkai kiba la wan ban ai jingkyrshan ïala ki jong ki kynhun bad dei haka minit bala jan kut ka kylla step ka Galaxy FC kala ioh ban pynkhih nyngkong ïaka jar lyngba ka Penalty da ka jingbakla jong uwei u rangïalehkai hajan diengkol.
Haba phai sha ka kylla miet, ka kynhun Blue Bombers kala pyrshang ban pynphai ïa katei ka shi kol, bad dei haka extra time hadien ka 90 minit satang ban kut noh da ka jingbakla jong uwei u rangïalehkai ka Galaxy kala pynlong ïa u Referee ban ai da ka penalty bad haduh ba kut ka jingïakhun kala kut noh hapdeng ka jingïakhaid da 1-1 kol ha kaba ki bor pynïaid kila rai syndon ban pynïashut da ka Tie Breaker bad dei haka jingïashut tie breaker ka Blue Bombers kala lah ban pynliem noh ïaka Galaxy FC da 4-2 kol.
Hakatei ka lympung u Bah Cornelius Laloo uwei naki nongthoh khubor ka Ri Bhoi u la shimbynta kum u konngsan ryngkat ka jingdonlang kiwei kiwei ki riew rangbah.
Ka jingïakhun Semi Final kan long haka sngi ba ar hapdeng ka Jaguar FC pyrshah ïaka Oste Phi Oin haka por 2 baje nohphai sngi.
