Shillong, Nailar, 06: Ka Railway Station ha Mendipathar mynta ka kynti ka la rung ha ka Amrit Bharat Station Scheme ba la pynbna paidbah da u Myntri Rangbahduh ka ri u Narendra Modi ha ka sngi u Blei ban shna pynbna biang ïa kane ka steshon rel kaba don ha rilum Garo.
Ïa kane ka steshon rel yn sa shna pynbna ryngkat lang bad ki 508 tylli ki steshon rel hapoh ka Amrit Bharat Station Scheme.
Ka Mendipathar ka dei tang ma ka, ka steshon rel ha Meghalaya ka dei kaba jrong 19.47 kilomitar bad kaba pynaisoh ïa ka Dudhnoi, Goalpara District, Assam bad ka Mendipathar, North Garo Hills District, Meghalaya.
Ïa kane ka projek la mynjur ha u snem 1992-93, hynrei ka la mad bun ki jingeh ha kaba sdang na ka daw ka jingpyrshah na ki nongshong shnong.
Hynrei hadien ba la plie paidbah ïa kane ka steshon rel, ka la kylla long u thied snam jong ki paidbah ka North Garo Hills ban pynkit ïa ki mar rep ba la pynmih na rilum Garo lyngba ka Rel.
Ka jingtyrwa ban shna ïa ka lynti Rel na Tetelia sha Byrnihat (22 kilomtiar) bad na Byrnihat sha Shillong (108 kilomitar) kim shym la lah satia ban urlong haduh kine ki sngi na ka daw ka jingpyrshah kaba jur na ka Khasi Studentss Union bad na kiwei kiwei ki kynhun sengbhalang.
Kine ki kynhun ki la kam ba ka jingwanrah ka Rel kan wanrah ïa ka jingrung kyrthep jong ki briew kiba nabar ka jylla bad ka jingkwah jong ki ka long ba ka Sorkar ka dei ban pyntreikam shwa ïa ka Inner Line Permit ha shwa ban pynsdang ïa kane ka projek.
Mynta wat ka jingtyrwa ban pynïasoh ïa ka lynti Rel na Barak Valley, Assam bad ka East Jaiñtia hills ruh ka la mih ka jingpyrshah kaba jur na ki kynhun bapher bapher kiba dawa ba dei ban pyntreikam shwa ïa ka ILP.
Dang shen u Myntri Rangbah ka Jylla u Conrad K. Sangma u la ong ba ka Sorkar Jylla ka ladep ïakren bad ka Sorkar Pdeng ba kan ym ïaid shakhmat ban shna ïa ka lynti Rel lada ki paidbah ki pyrshah.
“Nga la pyntip sha ka Sorkar India ba ngin ïaid shakhmat tang ynda la ïakren bad ïathir sani bad ki kynhun bapher bapher ha ka jylla. Ngin sa ïaid shakhmat tang lada ngi ladep ban ïakren bad ki paidbah,” la ong u Sangma.
U Myntri Rangbah u la pyntip ba ka Sorkar Pdeng kan ym lah satia ban shu ïai ap bad ka Ministry of Railways ka lah ban pyndam noh ïa ka projek shna lynti Rel sha Shillong bad yn kdad noh ïa kane ka projek sha kiwei kiwei ki bynta jong ka jylla.
