Rung final sa ka Shillong CA, khur ka Jennyfer ïa ka hat trick ba nyngkong jong ka lympung

Shillong, Nailur 15: Ka kynhun jong ki thei jong ka Shillong Cricket Association kan sa ïakynduh ban aireng pyrshah ïa ka Ri-Bhoi District Cricket Association ha ka final jong ka lympung Meghalaya Cricket Association’s U-19 Girls Inter District Cricket Tournament, kaba la pynkhreh ha madan Umbuda Ground, Nongpoh.
Haba phai sha ka jingïakhun kaba la long hynne ka sngi, ki thei ka SCA ki la lah ban khur ïa ka namjop kaba suk ïa ka Tura DCA da 129 ron ha kajuh ka madan jong kane ka semi final kaba ar. Hynnin ka sngi Palei, ka Ri-Bhoi ka la pynliem ïa ka South Garo Hills DCA da lai wicket ha ka jingïakhun jong ka semi final kaba nyngkong.
Ha kane ka jingïakhun jong ka semi final kaba ar, ka Jennyfer Fancon ka la ïoh ban khur ïa ka hat-trick kaba nyngkong jong ka tournament shuwa ba ka SCA kan pynhap baroh ki wicket jong ka Tura kaba kynjoh tang sha ka 45 ron katba dang beh ïa ka ron kaba haduh 175 ban jop. Hynrei watla kata ruh, ïa ka namtam lane ka Player of the Match award la khur da ka paralok jong ka, ka Monica Singh, kaba la khyrwit haduh 50 ron khlem shah pynhap (not out) shuwa ba kan khur saw wicket lyngba ka bol.
Ka Tura ka la jied ban ap bol nyngkong hadien ba ka la jop ïa ka toss, hynrei kane kam shym la don jingktah eiei ïa ki thei ka SCA ha kaba ki la ïoh ban kynjoh sha ka 174 ron bad shah pynhap 6 wicket na ki 25 over.
Ka Monica ka la khyrwit 50 ron na ki 55 bol lyngba ki san tylli ki four bad kawei ka six, katba ka Jayshree Singh ka la lah ban ïarap da kaba kamai 33 ron. Ryngkatlang, kine ki shijur ki la ïarap 51 ron na bynta ka kynhun na ki 5.3 over. Ka Awesa G Momin, kaba dei ka kapten jong ka Tura, kaba la lah ban lehkaibha napdeng ki thei kawangbol da kaba khur 2/15 na ki 5 over.
Haba beh ïa ka ron, ka Tura kam shym la ïohlad eiei naba ki thei kawangbol jong ka Shillong ki la ïoh ban pynhap wicket i wei hadien i wei bad kynjoh tang sha ka 45 na ki 15.1 over. Dei tang ka Pillika R Marak napdeng ki nongtied kaba la ïohlad ban kyntiew ïa ka ron na ka bynta ka kynhun, da kaba pyndep da 12 ron khlem shah pynhap na ki 16 bol.
Ka Fancon ka la ïohlad tang ban bol ar over bad ka dei thei kaba khadduh ban bol shuwa ban khur ïa ka hat trick, kata da 3 wicket na ki 10 bol. ka Monica, pat ka khur haduh 4/13 na ki 4.1 over, katba ka Jayshree ka la khur 1/14.
Lyngba kane ka namjop, ka Shillong Cricket Association ka la ïoh ban buh jaka ïalade ha ka final ha kaba kan sa aireng pyrshah ïa ki thei ka Ri-Bhoi District Cricket Association na ka bynta ka burom jong ka Meghalaya Cricket Association’s U-19 Girls Inter District Cricket Tournament 2023.