Rung final ka Meghalaya ha ka 3rd NECDC Senior Men, hap ïa knieh bad ka Nagaland ïa ka nam lahduh

Shillong, Jymmang 13 : Ka Meghalaya mynta kan ïa knieh ban rah ïa ka nam lahduh ha ka 3rd NECDC Senior Men’s Interstate Friendship Tournament 2025 hadien ba ka la jop ha ka semi final pyrshah ïa ka Arunachal Pradesh da 7 wiket ha ka jingïakhun kaba long ha Sovima Cricket Ground kaba ha Nagaland.
Hadien ba la jop ïa ka jingkynting pisa bad ailad ïa ka Arunachal Pradesh ban tied nyngkong, ka Meghalaya ka la ïoh ban pynliem lut ïa ki rangtied ha ka por ba ki dang ïoh kamai tang 101 ron ha ki 33.1 over. Haba beh ïa ka thong ka Meghalaya ka la lah ban pyndep tang ha ki 19.3 over.
Ïa kane ka lympung ïalehkai la pynlong da ka Nagaland Cricket Association hapoh ka lama jong ka North East Cricket Development Council. Kane ka sienjam ka long kum shi bynta ban pynkhreh ïa ki jylla na ka bynta ka lympung ïalehkai jong ka BCCI na ka bynta ka samoi ïalehkai jong u 2025 – 2026.
Da ka jinglah ban jop ha kane ka sngi, kane ka la pynlong ïa ka Meghalaya ba kan paw kum ka kynhun kaba lah ban ïalehkai bha. Lada nujor bad ar tylli ki lympung ïalehkai kiba hashwa ka jylla ka khlem lah ban poi sha ka final bad lah ban ong ba ka jingpynthut ki bor ka mariang kadei ka dawbah na bynta kane.
Haba phai sha ka jingïakhun ha kane ka sngi, ka jingjop jong ka Meghalaya ka dei da ka jinglah jong ki lai ngut ki rangkawang bol ba kynthup ïa u Manish Sharma, Ram Gurung bad u Aryan Borah kiba la lah ban khur bun wiket. Tang u Manish u la ïoh ban khur saw wiket ha ki 5.1 over katba u Ram pat u la ïoh ban khur lai wiket ha ki 7 over bad Aryan pat u ïoh lai wiket ha ki 10 over.
Lada kren shaphang ka Arunachal Pradesh, u rangïalehkai ba ïoh khur bun wiket eh dei u katen ka kynhun u Neelam Obi uba ïoh ban kamai 28 ron. Ka jingkhyllem kloi ki rangtied ka kynhun ka dei ruh na ka jingtbit jong ki nongkawang bol bad ki nongap bol jong ka kynhun.
Na ka liang ka Meghalaya u Ajit Bhatewara u la ïoh ban kamai kham bun ron kata da ki 49 ron na ki 39 bol kynthup ïa ki 10 tylli ki ‘four’ ne ki saw ron. Ma u ryngkat u Arien Bonchang Sangma uba ïoh kamai 22 ron, ki la lah ban kamai lang haduh 56 ron kum ki nongtied sdang jong ka kynhun.
Katba u Nishan Chakraborty 16 ron khlem pat hap bad u Lerry G Sangma (1 ron khlem pat liem) ki la long ki nongpynjop ïa ka kynhun ha kane ka jingïalehkai. Katba u kapten ka kynhun u Kishan Lyngdoh u la ïoh ban kamai 13 ron na ki 21 bol kum u rangtied hapdeng.
Mynta ka Meghalaya kan hap ban pynkhreh aireng pyrshah ïa ka lahduh ba snar ka Nagaland ha ka jingïakhun final kaban long ha ka sngi Palei. Ka Nagaland ka la ïoh ban rung sha ka final hadien ba ka la pynliem ïa ka Manipur da 4 wiket ha ka semi final kaba ar kaba long ha lane ka sngi.