Nongstoiñ, Nailur 02: Kawei ka samla ba 24 snem, ka la shah rong ha ka umsaw jong ka wah Porjalem, Nongstoiñ hynne ka sngi nyngkong.
Katkum ka khubor Pulit, kawei ka samla ba kyrteng ka Rilinda Symbei ba sah ha Nondeiñ, ka la leit saitjaiñ bad 3 ngut kiwei pat hapoh ka wah Porjalem. La ïathuh ba katba kine ki 4 ngut ki dang ïa saitjaiñ, u slap u la wan hap kynsan bad la pynheh kynsan ïa ka um.
Kine ki briew ki la ïohi ïa ka jingkiew kynsan ka um bad mar mar ki la pyrshang ban ïaphet sha ryngkew. Hynrei ka Rilinda Symbei ka la shah rong ha ka um kaba khlaiñ bor katba 3 ngut kiwei pat ki la lait jam sha ryngkew.
Ki Pulit ka Nongstoiñ Police Station haba ïoh jingtip ïa kane ka jingjia, ki la hiar wut wut sha katei ka jaka bad ha ryngkat ki Pulit ka Fire & Emergency Service, ki la pynlong ïa ka jingwad kaba jur ïa ka kong Rilinda hynrei dei ha ka por 4:30 baje janmiet ba ki la lap noh ïa ka metïap jong ka, kaba sahkut ha ki maw.
Ïa ka metïap la pynkit noh sha Civil Hospital, Nongtoiñ ban pyndep ïa ki jingdonkam baroh katkum ki lynti ka Aiñ.