Shillong, Nailur 22: Ka khubor ba la ïoh na ki pulit la ïathuh ba u K Dikylsing Phawa u la phah ka jingujor ba ha ka 16 tarik mynta u bnai, ki runar bym lah ban ithuh ki la prong hapoh ka ïing jong u kaba ha New Upper Colony, Laitumkhrah, Shillong bad ki la tuh ïa ki tiar kiba rem dor kiba kynthup ïa ki PVC pipe kiba shongdor kumba T. 80,000/-.
Ha kawei pat ka jingjia na ka liang ki pulit ki la ïathuh ba u Bah Plostarding Marweiñ u la phah ka jingujor ba ha ka 15 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar AS-01BK-9034 na Lailad, Umtap Ïewnongma (WKH).
Shuh shuh na ka liang ki pulit ki la ïathuh ba u Akos Lyngdoh u la phah ka jingujor ba ha ka 16 tarik mynta u bnai ha ka por 6 baje janmied, u la lap ba ki runar bym lah ban ithuh ki la tuh ïa ka pisa jong u kumba T. 1.82 lak napoh ka shnong Markham (EWKH).
