Shillong, Nailur 23: Ka khubor ba la ïoh na ki pulit la ïathuh ba u Bah D Emjingmut Pariat u la phah ka jingujor ba ha ka 16 tarik mynta u bnai, ki runar bym lah ban ithuh ki la tuh ïa 2 tylli ki Remote Radio Units (RRU) ba shongdor kumba T. 2.49 lak na ATC tower ba don ha ka shnong Moopyllaitsyiar (WJH).
Ha kawei pat ka jingjia ki pulit ki la ïathuh ba u Iohbait Shadap u la phah ka jingujor ba ha ka 18 tarik mynta u bnai ha ka por kumba 1 baje mynstep, ki runar bym lah ban ithuh ki la tuh ïa ka Bolero pick-up jong u kaba don u nombar ML-04D-8702 na ka shnong Phramer, Thaduthlong-C (WJH).
Shuh shuh na ka liang ki pulit ki la ïathuh ba ha ka 17 tarik mynta u bnai ha ka por kumba 7.45 baje mynmied uwei u briew ba la 50 snem ka rta u la ktah kti ïa la ka jong ka kurim bad ki khun bad kane ka la jia ha Ri-Bhoi District na ka liang ki pulit ki la bat noh ïa u tei u briew.
