Ring mynsiem ki paidbah da u pum pum naba jot rathai ka surok NH-6 ha thaiñ Narpuh

Khliehriat, Naiwieng, 25: Ka jingsniew shaba palat jong ka surokbah National Highway-6 ha ka thaiñ Narpuh, East Jaiñtia Hills District, ka la buh jingma ym tang ïa kiba leit ba wan hynrei wat ïa ki nongshnong shnong jong ka thaiñ.
U Bah Kerlang Ksoo uwei na ki nongshong shnong jong ka East Jaiñtia Hills ha ka jingjurip ba dang shen u la lap ba bun ki paidbah ha ka thaiñ ki la ïohpang na ka daw ka jingjur shaba palat u pum pum kaba la ktah ïa ka koit ka khiah jong ki haba ki ring mynsiem.
U Bah Ksoo u la ong, wat ki khynnah skul ruh kiba hap ban ring mynsiem da u khyndew pum pum. Bun ki khynnah ki la ïoh pang shit, jyrhoh bad pang shadem namarba ki hap ban ïaid hapdeng ka jingpum pum jong ka surok haba ki leit bad haba ki wan na ki skul jong ki bad kane kan sa ktah shuh shuh ïa ka koit ka khiah jong ki khynnah.
U la sakhi ruh ïa ka jingjulor ka surok naduh Tongseng, Sonapur terter shaduh Ratacherra katba nang mih ki sngi ka la nang pynmih shuh shuh ïa ka jingpumpum namarba la wan ka aiom tlang ba rang tyrkhong ka bneng.
“Lada ka jinglong jingman jong ka surok ha ka thaiñ Narpuh ka nang sniew katba nang mih ki sngi khlem pep ki paidbah kin sa shah ktah jur shuh shuh ha ka koit ka khiah, namar u pumpum u la rung shaduh thliew ïing jong ki briew bad wat hapoh ki dukan. Kane ka la buh jingeh bad buh jingma haduh katta katta ïa ka koit ka khiah jong ki paidbah” ong u Bah Ksoo.
U la pynpaw ruh ka jingsngewkhia namar ka jingdheng kali kaba ju jia khah khah ha ka thaiñ Narpuh kaba ktah ïa ka leit ka wan, kaba ktah ruh ïa ka por namar haba don ka jingdheng kali ka ju pynsyrtok ïa ki nongleit nongwan kiba hap ban mad ïa ka jingdheng kali da ki bun kynta bad kane baroh ka dei na ka daw ka jingsniew palat ka surok ka bym i dei shuh kum ka surok National Highway hynrei ka la long thik kum ka surok khlaw.