Resain noh u Joint Secretary ka HSPDP bad kiwei na ka party

Shillong, Risaw 12 : U Joint Secretary jong ka HSPDP Central Body Bah Banri Kupar Ryntathiang ba bat ruh kum u President Shillong City ha ka sngi Balang u la pynbna ba u la resain noh na ki kam jong ka party ryngkat bad katto katne ki nongïalam jong ka party.
Katkum ka kyrwoh, utei u heh HSPDP u la ong ba ka jingmih jong u ryngkat kitei kiwei ki nongïalam ka party na ka HSPDP kadei na ki daw ki bym lah kiar.
Ha ka kyrwoh la ong ba kiwei pat kiba mih lang bad u ki kynthup ïa u Bah S Lyngwa, Assistant Publicity Secretary HSPDP Shillong City ba dei ruh u President ka HSPDP Shillong North.
Katkum ka jingïathuh jong u, ïa mynta hi kim pat rai ban leit sha kano kano ka party lane ban kyrshan ïano ïano ha ka elekshon ban wan namar ki dang peit shwa ïa ka jinglong jingman ka sainpyrthei ha ka jylla.