New Delhi, Jylliew 25 : Ki thei ïalehkai football U-17 ka ri India ki la mad ka nam rem da 1-3 hakhmat ka Chile ha ka jingïalehkai paralok ha ka sngi Thohdieng ha Aquileia, Italy.
Haba phai sha katei ka jingïakhun ka India kam da lah ban ïalehkai bha haba ïanujor bad ka jingïakhun pyrshah ïa ka Italy ha ka jingïalehkai kaba nyngkong. Ka India ka la ïoh ka kabu thep kol ha ka jingïalehkai ba la ïaid 10 minit hadien ba ka Naketa ka la ïoh ban shut ïa ka freekick hynrei ka la khyrwit tam ïa u dieng kol. Ka India ka la ïakhun tyngeh hadien ba ka Chile ka la ïoh ban thep shi kol lyngba ka Katerine Ramos ha ka minit ba 11.
Ka India kaba la ñion sha ka kut jong ka Chile ka la ïoh katto katne ki kabu, ha ka minit ba 15 ka Shubhangi kaba la buh bha ha ki kjat ka Lynda kaba la khyrwit tyngeh hynrei ka thei ap kol ka Chile ka la ïoh ban kem suk. Ka Chile ka la ïakhun tyngeh bad ha ka minit ba 19 ka Maitte ka la ïoh ban thep ïa ka kol kaba ar ba la pyndei da ka khlieh lyngba ka bol ba la ai da ka Danlela.
Kumta ka jingïakhun ka la nang ïathnem, ka India ruh ka khlem duh mynsiem hynrei ka la nang ïakhun tyngeh ban pynphai ïa kitei ki ar kol. Ha ka minit ba 21, ka Lynda ka la tur shakhmat ban knieh ïa ka bol ba la pashat da ka Astam hynrei ka Lynda ka la pynlenoh ei ïa ka bol shabar u dieng kol. Ka jingïalehkai ka la sdang ban suki hadien ba ka Chile ka la thep ïa ka kol kaba ar.
Ha ka minit ba 26, ka Yennifer Pasten jong ka Chile ka la mynsaw bad la hap ban shong ben noh ba la mih bujli noh da ka Ambar Rolino. Ka Chile ha ka minit ba 34 ka la ïoh ïa ka corner hynrei ki thei ap dien ka India ki la ïoh da kaba suk ban kyrda na ka jingshah thep kol. Bad haduh kaba kut jong ka kylla step ka Chile ka la lamkhmat da 2-0..
Haba wanphai sha ka kylla miet, ka India ka la sdang da kaba tur beit sha ka kut jong ka Chile ha kaba ka Anita kaba la rah marwei ïa ka bol ka la khyrwit sha pyrshah ka kol hynrei ka thei ap kol ka Chile ka la ïoh ban kem da kaba suk.
Hadien ba ka India ka khlem lah ban thep kol na ka ling u Thomas Dennerby head coach u la pynmih madan arngut ha ka minit ba 51 ka Kajol bad Nitu Linda kiba la mih bujli ha ka jaka jong ka Lynda Kom bad Babina. Kane ka jingpynkylla ïa ka rukom pynmih madan ka la long kaba seisoh ha kaba ka India ha ka minit ba 55 ka la ïoh ban pynphai shi kol. Ka Neha kaba la shut ïa ka bol ba la poi beit sha ka Kajol kaba la thep kol da kaba pyndei tiak da ka khlieh.
Hynrei ka jingkyrmen jong ka India ka la poi noh sha kaba kut hadien ba ka Ambar ka la thep ïa ka kol kaba lai na bynta ka Chile ha ka minit ba 67.
Da kinew ki lai kol ka la pynkmen bad ai mynsiem shuh shuh ïa ka Chile kaba la ïakhun beit triang ban ym ailad ïa ki jingpyntshang thep kol ka India. Katba ka India watla ka la ïakhun tyngeh khlem pyndem pynban kam ïoh shuh ban pynphai kol bad mad noh ka nem rem da 1-3 hakhmat ka Chile.
