Shillong, Risaw 09 : Ki ar tylli ki kynhun ïakehkai kriket ka jylla Meghalaya ki la mad nam rem ha ki lympung ïalehkai jong ka BCCI ha ka sngi Saitjaiñ, ka kynhun jong ki shynrang ka la rem ha ka Vinoo Mankad Trophy bad ka kynhun ki kynthei ki la rem ha ka Women’s U-19 T20 Trophy.
Ha ka Vinoo Mankad Tropy ka Meghalaya ka la rem da phra wicket ha ka Goa, katba ha Hyderabad ka kynhun ki kynthei ka la rem da 10 wicket ha ka Delhi.
Ha ka Vinoo Mankad Trophy, kaba dei ka one day tournament jong ki U-19 (boys), ka Goa kaba la jop ïa ka jingkynting pisa ka la kawang bol nyngkong ha ka jingïalehkai kaba dei na ka Group C ha ka jingïalehkai ha Pune, ha kaba ka Meghalaya kaba la tied nyngkong ka kamai 180/7 ha baroh ki 50 over.
Ki nongtied sdang u Mrityunjay Bharali (65) bad Mrinal Das (53) ki la lah ban ïalam kamai bun ron na bynta ka kynhun da kaba buh 108 ron na bynta ban duh noh shi wicket, kaba la pynsyaid mynsiem ïa ka kynhun. Phewse, kiwei pat ki nongtied kiba shadien ki khlem lah ban da kamai ron tang u Shavian Blah (36) uba la kamai kham bun. Ka jinglah ban ïarap kamai jong u (Shavian) ka Meghalaya ka la kamai 180 ha baroh ki 50 ver.
Hynrei katei ka thong ba ka la buh ka long kaba rit eh ha kaba ka Goa ka la lah ban kynjoh sha ka thong tang ha ki 33.2 over bad duh noh tang 2 wicket. U Bharat Gurung (1/26) bad u Raghav Magotra (1/44) kidei ki arngut ki rangkawang bol ka Meghalaya kiba la ïoh pynhap wicket.
Ka Meghalaya mynta ka sngi Nyngkong kan ïakhun pat sa bad ka Tripura. Ka Tripura ha katei kajuh ka sngi ka la rem ha ka Rajasthan katba ha ka jingïakhun ba nyngkong jong ka la pynsangeh noh.
Katba ka jingïalehkai ha Hyderabad, ka Delhi ka donkam ban khur jingjop ban bat kyrdan ba nyngkong ha ka Group B bad ban rung sha kawei pat ka wat ïakhun ha kaba ka la lah ban khur ïa ka jingjop.
Ka Meghalaya kaba la jop ïa ka jingkynting pisa ka la kam trai ban tied nyngkong hynrei ka la shah pynhap wicket noh bad kamai tang 24 ron ha ki 12 over. Ka Delhi haba beh ïa ka ron ka la lah ban jop da kaba suk tang ha ki 2.3 over khlem da duh wicket.
Kumta ka Meghalaya ka la pynkut ka jingïalehkai da kaba bat ha ka kyrdan ba saw na ka Group B da kaba jop tang arsien kaba la tam ïa ka Goa bad Sikkim kiba don sha trai duh.
