Khur jingjop ka Ïewrynghep SC, Jongksha FC bad Rngibah SC

Shillong, Risaw 09 : Ka wat ba nyngkong (1st round) jong ka Zone 2 ha Jongksha kaba dei ka lympung ïalehkai phutbol jong ka Mawkynrew Cup 2022-23 ka la poi noh sha kaba kut ha ka sngi Saitjaiñ jong ka taïew ba lah dep.
Ha katei ka jingïalehkai ba khatduh jong wat ba nyngkong, ka Ïewrynghep SC, Jongksha FC bad ka Rngibah SC ki la khur nam jop. Ka Ïewrynghep SC ka la khur jingjop da kaba pynliem noh da 3-1 kol pyrshah ïa ka Rapleng SC ha ka jingïalehkai kaba nyngkong. Ïa kitei ki lai kol la thep da u Damankhraw Umsong uba la thep ar kol ha ka minit ba 13 bad 38 bad u Rainard Khriam ha ka minit ba 56 katba ïa ka shi kol na bynta ka Rapleng la thep da u Kynjohshaphrang Warbah ha ka minit ba 59.
Ha ka jingïalehkai kaba arsien, ka Jongksha FC ka la pynliem da 3-0 kol ïa ka Thangbnai SC bad ïa kitei ki lai kol la thep da u Abrestar Kharsahnoh ar kol ha ka minit ba 15, 43 bad u Khrawbhalang Songthiang u la thep shi kol ha ka minit ba 39.
Ka jingïalehkai ba khatduh ha katei ka sngi ka la long hapdeng ka Rngibah SC bad ka Tanglei FC ha kaba ka Rngibah SC ka la jop salit da 1-0 kol lyngba ka free kick u Riskhemlang Khriam ha ka minit ba 33.
Ha kane ka sngi la wan ban sakhi ki paidbah nongkyrshan jong kitei ki hynriew tylli ki team ha ryngkat ka jingdonlang ki nongkitkam ka Maw-kynrew Cup Committee bad ki riew rangbah jong ka dong ka thaiñ.