Rat ka trok kit rnga ïa u Post elektrik ha Lower Balian, sahkut lut ki kali heh, duh light bun ki shnong

Nongpoh, Jymmang 21: Kawei ka trok kaba la kit palat pud ïa u rnga kala leit ban rat ïa u sainar elektrik hajan CMJ Breweries ha Lower Balian haka thaiñ Byrnihat, haduh ba uwei u post elektrik ba kham heh u la kdiah syndon ha surok bad bun kiwei ki post elektrik ba kham rit kila duh, kaba la wanrah ruh ka jingdheng kali namar ki kali heh kim lait shuh ban leit ban wan lait noh noh ki kali ba khamrit kum ki auto, bad bun ki shnong ba marjan ha katei ka jaka kila duh light.
Katkum ka jingtip bala ioh lum la ïathuh ba kane ka jingjia kala jia mynta ka step haka por kumba 7 baje eiei ha kaba katei ka trok kaba don ïa u Registration Number RJ 48 GA 5606 kaba la kit palat pud ïa u rnga kala leit ban rat beit ïa u sainar elektrik namar ka jingkynjang jong u rnga bala thep ha katei ka trok, haduh ba u post elektrik u la kdiah beit hapdeng surok.
Katto katne ki riew paidbah kila pyntip ruh ba ka jingkit palat pud jong ki trok kiba leit sha ki karkhana ha katei ka jaka kala long kaba palat, bad bunsien namar ka jingkynjang jong ki mar ba ki thep haka trok ki ju rah da u siej ïa utei u sainar u ba ïaid na shilliang sha shilliang utei u surok, bad dei ha kane ka kynti ba katei ka trok kit rnga kala rat syndon ïa u sainar haduh ban da kdiah ki post elektrik, bad haduh ban da thoh ïa kane ka khubor ym pat lah ban weng ïa katei ka trok bad utei u post elektrik bala kyllon ha surok.