Shillong, Naiwieng 08: Ka la bam por tang kumba shi kynta ïa ka kynhun ïalehkai kaba ïakhun shabar nala ïing, kata ka Jammu & Kasmir ba kan pynliem noh ïa ka Meghalaya da 7 wiket ha ka jingïakhun jong ka Ranji Trophy Elite Group A ba la long ha madan kriket jong ka MCA, ha Polo.
Haba wan ban sdang na ka 16 ron hadien ba la hap noh shi wiket, ka kynhun ïalehkai ka J&K ka la duh noh satang ar wiket ha ki kti jong u Akash Choudhury.
Pynban wat lada ka kynhun ïalehkai ka Meghalaya kan mad ïa kane ka nam rem kaba saw sien lynter ka jong ka ha kane ka kyrdan ïakhun jong ka Ranji Trophy mynta ka samoi, hynrei lada phaidien sha kane ka jingïakhun kaba dang shu dep, lah ban kdew ba ka jingmihpaw ki dak ki shin ba ka kynhun ka la sdang ban kiew bha ha ka ïalehkai, ha kaba ha kane ka samoi ka kynhun ïalehkai jong ka jylla ka la hap ba kan mih madan ban ïakhun pyrshah ïa ki kynhun ïalehkai jylla kiba la paw bad tbit bha ha ki lympung kriket jong ka ri ba la pynïaid da ka BCCI.
Haba phaidien biang sha kane ka jingïakhun, ka Meghalaya hadien ba ka la rem ha ka jingkynting pisa, (toss), ka la lah hap ban tied nyngkong bad ka la lah ban kamai 73 ron, kaba jia long ha ka step kaba ka madan ryngkat bad ka suiñ bneng kam ailad ïa ki rangtied (batsman) ki jong ka ban lah ban kamai kham bun ïa ki ron.
Haba shimti ïa ka inning ban bol pat, ki rang ka Meghalaya ki la lah ban tehlakam ïa ki nongtied ba nakhmat (batsman) jong ka J&K tang hapoh ka 200 ron katta 194.
Ha ka kylla tied kaba ar (second innings), ki nongtied ka Meghalaya ki la lah ban kamai haduh 195 ron.
Haba phai sha ki bowler, u Aaryan Borah ba dei u left arm spinner u la lah ban pynhap ïa 5 ngut ki wiket naka bynta 42 ron, bad na ka liang ki nongtied kiba seisoh, u Arpit Bhatewara u la lah ban kamai 74 ron ha ka inning tied kaba ar.
Da kane ka resol, ka kynhun ïalehkai ka jylla kan khreh ban mih pat na la iing ban hiar sha Vadodara ha kaba kan aireng pyrshah ïa ka Baroda kaban sdang naduh ka 13 tarik mynta u bnai Naiwieng.
