Shillong, Nohprah 22 : Ka Meghalaya ka la lah ban ïalehkai bha da kaba pynliem da 10 wicket pyrshah ïa ka Sikkim ha ka lympung ïalehkai Ranji Trophy ha madan MCA.
Hadien ba ka la lamkhmat ïa ka inning ba nyngkong da 13 ron, ka Meghalaya ka la ai kamai tang 90 ron ïa ka Sikkim kaba donkam ban jop da 78 ron ha ka jingïalehkai kaba la neh shi kynta tam ha katei ka jingïalehkai.
Khlem da pynsep ei ïa ka jingïalehkai kaba lai sien, u Raj Biswa u la ïalam ïa ka kynhun sha ka jingkyrmen da kaba kamai shiteng spah ron (half century) kata da 56 ron na ki 32 bol, kaba kynthup ïa hynñiew tylli ki four. Kane kadei ka jingkamai half-century kaba lai na bynta jong u ha kaba kum kane ka lympung.
Ha kaba kut jong ka jingïalehkai u Kishan Lyngdoh, u la kamai 16 ron (not out) da kaba khyrwit lai tylli ki four ha kaba ka Meghalaya ka la pyndep ïa ka jingkamai ron tang ha ka 8 over da ka run rate kaba 9.75.
Shwa kane, ka Meghalaya ka la bteng biang ïa ka inning kaba nyngkong da kaba kamai 46/3 ha ka por mynstep, 94 ron shadien ka Sikkim kaba kamai 140 ron bad shah pynhap lut baroh ki wicket ha kajuh ka sngi.
Ka Meghalaya kam lah ban kamai ron bun ha ka por mynstep, hynrei ka la kamai 88 ron bad shah pynhap 8 wicket ha kaba u Punit Bisht (guest professional) uba dei ruh u kapten u kamai tang 24 ron, u Bamanbha Shangpliang 19 ron bad u Dippu Ch Sangma 14 ron. Kiwei pat kiba la lah ban ïarap ïa ka kynhun ki kynthup u Rajesh Bishnoi bad u Akash K Choudhary, kiba la kamai mar 59 ron ha ka jingduh noh khyndai wicket.
Ka Meghalaya kan sa wanphai biang hadien ba la dep ka Christmas ha kaba kan sa ïakhun pyrshah ïa ka Bihar naduh ka 27 tarik Nohprah ha madan ïalehkai kriket jong ka MCA.
