Rakhe sngi pynneh mariang ka DMC, Scouth and Guide, KSU-NC bad Meghalaya Cement Ltd

Khliehriat, Jylliew 05 : Ka jingrakhe ïa ka sngi pynneh mariang ha East Jaiñtia Hills District ka long ha ki rukom bapher bapher ba la pynlong da ka District Mission Coordination lem bad ka Scout and Guide, ha Khliehriat, kumjuh ruh ka Khasi Students Union Narpuh Circle, kaba la pynlong ha Divine Word Secondary School Lumshnong bad ka company dewbilat jong ka Meghala Cement Ltd (Topcem), ha Thangskai.
Ka District Mission Coordination ha ryngkat ka jingiatreilang bad ka Scout and Guide lem bad ka tnat pule puthi, East Jaiñtia Hills District, mynta ka sngi ka la pynlong ïa kane ka jingrakhe sngi pynneh mariang da kaba la pynlong da ka jingiaid rally ha Khliehriat bad jing tam ïa ki plastik bad ki kot jot kiba la saphriang, ha kane ka prokram la wan ban ïa shimbynta lang da ki khynnah scout and guide na ki skul bapher bapher kiba don ha East Jaiñtia Hills District ba la lam khmat da u District Secretary Meghalaya Bharat Scout and Guide, u bah Emanuel Shangpliang bad ka District School Education Officer East Jaiñtia Hills District, ka kong P.Dkhar, ka District Pedagony Coordinator, ka kong Manbha Suja.
U Deputy Commissioner ka East Jaiñtia Hills District, u Abhilash Banarwal, IAS haba kren ha ka jingialang ha shwa ban pynlong ïa ka jingiaid rally, u la ai ka jingkhblei ïa ki nongpyniaid ïa kane ka prokram bad kumjuh ruh ïa baroh ki khynnah kiba la wan ban ïa shim bynta ha kane ka prokram, u la ong ruh ba ka long kaba donkam ban pynneh pynsah ïa ka mariang bad kumjuh ruh ïa ka khuid ka suba, u la kyntu ïa ki lhynnah ba kim dei ban bret pathar ïa ki plastik namar kane ka pynsniew ïa ka mariang.
Kiba la iasim bynta lang ha kane ka prokram ki kynthup u office Assistant Meghalaya Scouth and Guide, u bah Elvis Dkhar, guide Captain Moolamylliang Upper Primary School , ka kong Pynwan sutnga, Scout Master Sutnga govt School, u Mondaystar Sutnga, Guide Captain Saraswati Mandir School, ka Youtang Chyrmang, Scout Master Star Public School, u Bijoy Biam, Guide Captain Star Public School , ka Laxmi Sarkar.
Ka Meghalaya Cement Ltd, kaba ju tip ruh kum ka Topcem Cement, mynta ka sngi ka la pynlong da ka prokram thung dieng, ha ki sawdong saw kun jong ka Cement Plant, ban pynlong ïa ka mariang kaba kup rong jyrngam bad la thung ruh ïa ki bun jait ki jait dieng, ym dei tang ha kum kine ki sngi kyrpang, hynrei ki nongtrei jong ka Topcem Cement, man la ka por ki la ju pynlong ïa ka jing thung dieng bad ki sawdong sawkun jong kane ka karkhana ruh ki dap da ki dieng ki siej, ka don ruh ki jaka thung jingthung kaba biang hapoh kane ka company bad ka don ruh ki Green House, ka don ruh ka jaka ba ju thung ïa ki syntiew, ka don ruh kawei ka jaka ba ju khot ka Green Colony kaba kup rong jyrngam, ka jingdon shibun ki dieng ki siej hapoh kane ka company, ka pynlong ïa kane ka karkhana ban lait na ka jing pum pum dewbilat.
Ki heh jong ka company kiba la ïa shim bynta lang ha kane ka prokram thung dieng ki kynthup u President Meghalaya Cement Ltd, u R.K. Pareek, u Vice President, u S.K. Sinha, u AVP, u M.K.Jain, u General Manager, u Umesh Kumar, u General Manager, u H.C.Kapil, u Deputy Manager, u Bikky Dutta bad kiwei kiwei.
KSU-NC: U President jong ka Khasi Student Union, Narpuh Circle, lyngba u kyrwoh u la ong ba “Kum shi bynta ban ïa snohkti lang bad ki ri jong ka pyrthei baroh ban rakhe ïa ka sngi kyrpang kaba dei ka sngi pynneh mariang ne ka World Environment Day, ka KSU Narpuh Circle mynta ka sngi ka tarik u jylliew 2023, ka la pynlong da ka jingiakop thoh Slogan bad jingiakop Draw dur, la pynlong ïakanekaprokram ha Divine Word Secondary School Lumshnong.
Ha kane ka jingiakop thoh Slogan bad Drawing la wan ban ïa shim bynta da ki 6 tylli ki school kiba don hapoh ka thaiñ Narpuh, ka Umkiang Holy Cross Higher Secondary School, Narpuh Modern Secondary School Umkiang, Christian Sececondary School Lumshnong, Divine Word Secondary School Lumshnong, KJP Synod School Thangskai bad Chiehruphi Secondary School, ha katei ka jingiakop la jied saw ngut ki khynnah na kawei-kawei ka school ha kaba ar ngut ki la shim bynta ha ka jingiakop thoh slogan bad ar ngut pat ki la ia shim bynta ha ka jingiakop draw.
Ha shwa ban sdang ka prokram, ka la don ka jingialang kaba lyngkot ha kaba la ioh ïa ka jingkren lyngkot na u Principal jong ka Divine Word Secondary School Lumshnong, u Fr. Tonio Mathew bad kumjuh ruh, na u Environment Secretary ka KSU EJHDU, u bah Phanuel Tongper bad la pynlong ruh ïa ka jingthung dieng, ïa ka prokram la pyniaid da u President KSU Narpuh Circle, u bah K.S.Suchiang bad ka seng ka la pynkhreh ïa ki khusnam na ka bynta kito kiba jaop ha kane ka jingiakop.