Khliehriat, Nailar 24 : Ki nongïalam bad ki dkhot jong ka National People’s Party East Jaiñtia Hills District, mynta ka sngi ki la pynlong ïa ka prokram bad kyrpang ha conference hall jong ka Wika Guest House Khliehriat, ha kaba la rakhe pyndonburom ïa ka jingdap shiphew snem ka party NPP.
U MDC ba rim jong ka Bataw, u bah Joinriwell Pyrtuh, uba dei ruh u Vice President Jong ka NPP- EJHD, u la ai ka jingiaroh ïa ka party NPP bad ong ruh ba dei tang ka NPP kaba ka mih sha khmat bad shim ïa ka synjam ban ïa pynbeit bad pynbit pynbiang ïa u pud u sam jong ka jylla Meghalaya, ha kaba ka jylla Meghalaya ka don ki khappud bad ka jylla Assam bad kumjuh ruh ka don ki khappud bad ka ri Bangladesh.
U bah Seibor Shadap, u MDC jong ka Sutnga-Narwan, u la ong ba kane ka party NPP ka la sdang ban suh thied ha East Jaiñtia Hills District naduh u snem 2018 ba la wanrah da u MLA barim jong ka Sutnga- Sapung Constituency u bah Hopeful Bamon bad haduh kine ki sngi kane ka party ka dang neh dang sah hapoh ka district, u la ong ruh ba naduh ba wan kane ka party hapoh ka district, u la rung ban long kum u dkhot jong ka party bad haduh mynta u dang dei uwei na ki nongïalam jong ka party hapoh ka district.
Ha kajuh ka por, u bah Seibor Shadap, u la ai ka jingiaroh ïa ki nongïalam kiba rangbah jong ka party kiba la saiñdur ïa kane ka party ha kaba ka jingïaid lynti jong ka party ruh ka long kaba sngewtynnad bha ha kaba u nongïalam ba hakhmat eh kum u Conrad Sangma, u dei u briew uba don ka mynsiem ban iarap ym tang ïa ki nongïalam bad ki dkhot hynrei uba don ka mynsiem ban iarap ïa ki paidbah jong ka jylla hi baroh kawei.
Ki nongïalam bad ki dkhot jonga ka NPP na East Jaiñtia Hills District, ki la pdiang burom ruh ïa ka kong Jhanika Siangshai lem bad ki paralok kiba la wan ban pynïasoh bad ka party NPP, kum ban shu pynkynmaw, ka kong Jhanika Siangshai kaba ju long teng kum ka President Mahila Congress Committee EJHD lem bad ki paralok kiba dei ki dkhot kiba don haduh 290 ngut, ki dei kiba la iehnoh kam na ka Mahila jong ka party Congress bad kiba la rai ban pynïasoh noh bad ka party NPP.
Kiba la ai jingkren ha kane ka sngi ki kynthup ruh, u General Secretary, u bah Lalminga Ngamlai, u MDC Moosniang Rangad, u bah Phasmon Dkhar, u General Secretary NPP Khliehriat Block, u bah Iasyllok Lyngdoh bad kiwei kiwei, ïa ka jingialang la pynïaid da u Vice President NPP (EJHD), u bah Phulman Rymbai.
