Nongstoiñ, Lber 24: Ïa ka sngi kyrpang na ka bynta ban rakhe ïa kiba don ka jingpang TB, la pynlong da ka ophis jong ka District Tuberculosis Office ryngkat ka District Medical Health Officer West Khasi Hills ha Hall jong ka St Francis College. Ha kane ka jingïalang ba kyrpang la donlang ruh da u MLA jong ka Nongstoiñ u Bah Gabriel Wahlang kum u kongsan, nangta u Bah V. Swer kum u symbud kongsan.
Haba ai jingkren ha ka jingïalang u Bah Gabriel Wahlang MLA, u la ong ba ka jingpynkut ïa ka jingpang TB ka dei ka jingïatreilang jong baroh. Ka por ka dei ban pynsngewthuh ba kiba pang TB kim dei shuh ban sngew marwei, hynrei ki dei ban don ka mynsiem ban ïatreilang bad kita kiba don bynta ban sumar bad ai ha ki ïa ka jingkoit jingkhiah ba pura.
Ban rat diengkhong ka donkam ïa ka jingshimkhia na baroh ki liang, namar ki doctor lane ki nongtrei kim lah ban shu leit hi sha man la ki shnong lymda dei ka jingïatreilang jong kiba haïing hasem bad khamtam ki bor shnong. Ka rukom bam bad ki jingbam kiba tei met ki dei kiba kongsan nalor kaba dih ki dawai, u la ong.
“Hooid katkum ki jingshitom ki don kiba donkam dih dawai haduh shi snem ne palat ïa kata ruh, hynrei kaba kongsan ka long ba ki nongpang ki dei ban ïatreilang bad aiti ïalade ryngkat bad ki doctor kiba sumar ban pynïoh pat ha ki ïa ka jingkoit jingkhiah.
Kiwei kiba la ai jingkren pynshai bad batai bniah, ki kynthup ïa i Dr Mrs M. Sohliya DMHO, Dr R.H Basaïawmoit DTO WKH, Bah V.Swer ADC kum u symbud kongsan, na ka liang ka College bad la sam ruh ïa ki khusnam sha ki nongïalam shnong jong ki shnong ka West Khasi Hills kiba ki shnong jong ki, ki la lait phar na kane ka jingpang TB.
