Shillong, Lber 24: Ka kynhun shipai Assam Riffle kaba dei ka kynhun shipai ba la rim tam ha ka Ri India ka la pynlong ïa ka jingleh burom ïa ki shipai kiba la shongthait na ka kam hadien ba ki la ai ka jingshakri ban ïada ïa la ka jong ka ri kum ki shipai.
Ha kane ka jingpyndonburom ïa ki shipai kiba la shongthait kiba la lenlade na ka bynta ka ri kum ka jingburom ïa ki la pynlong bun ki jingleh kyrpang da kaba buh syntiew ha u mot ba la shan kyrpang na ka bynta jong ki kum ka jingburom bad ha kane sngi la kynmaw burom ïa ki kam kiba khraw.
Ka kynhun shipai Assam Riffle haduh mynta ka dang don 97,264 ngut ki shipai kiba la shong thait, ban peit ïa ka jingdon kam jong ki, ki don 587 tylli ki jaka ha baroh ki jylla jong ka Ri India bad 35 tylli ki ophis ban peit ïa ka jingtreikam na ka bynta kiba la shong thait bad lai tylli ki ophis kiba peit tang ban siew ïa ka bai bam tynmen.
Ha kane ka jingpyndon burom ki shipai kiba la shong thait kiba la wan ban ïa shim bynta ki long 118 ngut kiba dei na kane ka jylla Meghalaya, ïa kane ka sngi la pynphuh da ka jingdonlang u Lt Gen Vikas Lakhera, AVSM, SM, DG Assam Rifles kum u kongsan bad ha ka jingkren ka jong u la ai ka jingïaroh ïa baroh kiba la noh ïa ka bynta ka jong ki ha la ki bynta bynta.
