Nongpoh, Nailar 13: Kum ka jingpynsah jingkynmaw halor ka jingdap ba 3 snem jong ka jingïaid lynti jong ka Village Organisation haka Shnong Byrsiej ïa kaba la tip kum Jingïatyllilang Village Organisation, kane ka kynhun ki Longkmie lyngba kane ka Village Organization mynta ka sngi ka la rakhe ïaka jingdap ba 3 snem jong kane ka kynhun ki longkmie kiba kynthup ïaka jingïalumlang jong ki 11 tylli ki Self Help Group ha kane ka shnong.
Ha kane ka sngi la ioh ruh ïaki jingrwai bad jingshad na ki longkmie kaba long kum ka dak jong ka jingïakmenlang bad kumjuh ka jingpyninam ïaka riam kaba la pynwandur da ki jingshna lane ka design kaba la shna hi da kito kiba wan shim bynta ha kane ka jingrakhe ïa ka jingdap lai snem ka Village Organization.
Lyngba jong kane ka sngi, la ioh ruh ban ot ïa u cake dap 3 snem jong ka Village Organisation da ka jingïashimbyntalang jong ki nongshah khot sngewbha ha kane sngi kiba kynthup ïa U Bah Garlanding Sunn uba dei u Block Coordinator ka Bhoirymbong C&RD Block uba long ha kajuh ka por uwei na ki samla rangbah ka thain uba la mih bha shakhmat na ka bynta ki kam nohsynniang sha ka imlang ka sahlang.
Kiwei kiba la don lang ki kynthup ruh ïa u Bah Richborn Suting uba dei Branch Manager jong ka Meghalaya Rural Bank Mawlasnai Branch, u Bah Vanlal Thabah Uba dei u cluster coordinator, u bah Martin Mashli uba dei u Rangbah Shnong ka shnong Byrsiej, u Bah shemphang Sten uba dei u Secretary Shnong, ka Kong Jovita Sten iba dei i president ka jingïatyllilang village organisation, ka kong Diangrilang Madur iba dei i secretary ki dkhot ka village organisation ki samla Shnong bad ki heprit na ka shnong kiba la wan ban sakhi ïaka jingrakhe lehkmen ki longkmie ka jingïatyllilang village organisation.
Haba ai jingkren ha kane ka sngi na ka liang jong u Bah Garlanding Sunn u la ong ba ka jingïatreilang ka dei kaba donkam bha ha ka imlang ka shalang, namar kano kano ka kam kaba ngi trei khlem da don ka jingïatrei lang ngin nym lah ban poi sha ka thong kaba ngi angnud ban trei na ka bynta ka imlang ka sahlang.
Ha kane ka sngi la pynphuh pynphieng ruh ïa kane ka jingrakhe dap 3 snem ka Village Organizatoin da ki jingshad bad ki jingrwai na ki longkmie kiba dei ki dkhot na ki Self Help group bapher bapher kiba don ha kane ka Village Organization.
