Shillong, Lber 22: Ka Ramakrishna Mission Vivekananda Cultural Centre, Shillong mynta ka sngi ka la rakhe ïa ki jingjop jong ka kynhun ba 109 jong ki shah hikai Computer bad ka kynhun ba 47 jong ki samla pule ktien. La sam baroh 317 tylli ki syrnot sha ki samla pule kiba la leh bha ha ka jingpynkup burom kaba la long ha ka por shiteng sngi.
Ka jingkut jingmut ban pynkupbor ïa ki samla
Ka Ramakrishna Mission Vivekananda Cultural Centre, Shillong ka dei kaba la shimkhia ban pynkup bor ïa ki samla lyngba ka jingnang jingstad bad ka jingkyntiew ïa ki sap ki phong. Ka centre ka ai jinghikai kumba 6,000 ngut man la u snem ha ki jingpule computer bapher bapher ha ki san tylli ki bynta. Kane ka jingïalang pynkup burom kaba mynta ka ithuh ïa ki jingjop jong kumba 400 ngut ki shah hikai na ki jylla bapher bapher jong ka thaiñ Shatei Lam Mihngi.
Ka jingithuh ïa ka jingtbit ha ka jingpule
La pynkup burom ïa ki samla kiba la wan shakhmat ha man ka thup da ki memento bad ki khusnam ba kyrpang. Harum ki long ki kyrteng jong ki samla pule kiba la ïoh ïa ki jingjop: Computer-Beginner: U Winson Dkhar, Intermediate: U Pravin Gurung, Tally-I: U Banteibor Sohlang, Tally-II: U Yullian E Kupar Lyngdoh Thabah, DTP :Ka Tapot iChanda, Database: Ka Suhana Nongrum, Python: Ka Maya Boro, DEO: Ka Melaai Khnogjliw, Language and Communication skill: Ka Melarihun Dungngan. Shuh shuh, ka Medarishisha L Ryntathiang na ka bynta ka jinglehbha jong ki.
Ki kyntien ai mynsiem
U Swami Yogatmananda, myntri ba dei peit ïa ka Vedanta Society of Providence, USA u la ai jingkren kum u kongsan ha kane ka sngi. Ka jingkren jong u kaba dap da ki jingïathuh khana bad ki nuksa ka la pynshlur ïa ki samla pule ban pyndonkam ïa ka jinghikai teknikal ha ka jingim. U la ong ruh ba ka jingstad bad ka jingtei ïa ka jinglong ka dei ban long ka bor na ka bynta baroh ki jingpule ban pynlong ïa ka jingim kaba don jingmut jong ki briew.
U Swami Vedeshananda, Director of Academics, u la ai khublei ïa ki samla pule halor ka jingjop jong ki bad ai mynsiem ïa ki. U la pynkynmaw ïa ki ïa ka jingdonkam ban im da ka jinglong ba janai bad u la ai mynsiem ïa ki ban shim na ka jingstad jong u Swami Vivekananda, da kaba ai bor ïa ki ban wanrah ïa ka jingktah kaba bha.
U Swami Divyaswarupanandaji Maharaj uba dei u Centre-In-Charge u la pynkut ïa kane ka jingïalang da kaba pynpaw ka jingsngewnguh ïa baroh kiba don bynta bad ban ïasam ruh ïa ka jingstad jong u Swami Vivekananda ha ka ktien Khasi bad Phareng.
Shaphang ka Ramakrishna Mission Vivekananda Cultural Centre, Shillong
Ka Ramakrishna Mission Vivekananda Cultural Centre, Shillong, ka dei ka seng kaba pynleit jingmut ha ka kam ba kynja mynsiem bad ka jingshakri ïa imlang sahlang. Kane ka jaka ka ai ïa ki prokram ai jinghikai kiba bun jait, kynthup ka jinghikai computer, ki jinghikai shaphang ka ktien, bad ki kam kiba ïadei bad ka deiriti.
