Rakhe ka NSO Shillong ïa ka Statistics Day bad jingdap 75 snem ka National Sample Survey
Shillong, 30 Jylliew 2025: Ka National Statistics Office, Field Operations Division, Regional Office, Shillong, ka la rakhe ïa ka National Statistics Day kaba 19 ha ka 29 tarik Jylliew 2025 ha Conference Hall jong ka. Katei ka sngi ka dei ka jingkynmaw burom ïa ka lyngkhuh sngi kha jong u riewstad statistics ba pawnam, u Professor Prasanta Chandra Mahalanobis, ïa uba la tip kum u “Kpa jong ka Indian Statistical System.”
La rakhe man la u snem, ka National Statistics Day ka thmu ban pynsngewthuh paidbah – khamtam eh ha ki samla – shaphang ka bynta ba kongsan jong ka jingkheiñ jingdiah ha ka jingsaiñdur ha ka imlang sahlang bad ka ïoh ka kot, ka jingthaw polisi kaba pynshong nongrim ha ki sakhi, bad ka roi ka par jong ka ri baroh kawei. Ka jingrakhe mynta u snem ka long kaba kongsan bha namar ba ka ïahap bad ka jingdap 75 snem jong ka National Sample Survey (NSS), ka nongrim jong ka jingsynshar ïa ka India ba la pynïaid da ka data.
La sdang ïa ka prokram da ka jingkren pdiang burom na ka Kong S. Kharjana, Senior Statistical Officer, kaba la pynpaw ïa ka jingkongsan jong kane ka sngi bad ka jingïadei jong ka phang pdeng mynta u snem. Ha ka jingai jingkren, u Dr. Prabhata Das, Assistant Director, NSO (FOD), Shillong, u la pyndon burom ïa u Prof. Prof. Mahalanobis bad u la pynpaw ïa ka jingktah kaba neh jong ka NSS naduh ba la sdang ïa ka ha u snem 1950.
U la ban jur ba ka NSS ka la ïarap bha ha kaba pynwan dur ïa ka jingthmu jong ka ri da kaba pynmih ïa ki jingtip ba bniah shaphang ka jingbun briew kiba donkam bha na ka bynta ban thaw ïa ki polisi ha ki bynta bapher bapher.
Related Posts
U Bah O. Patton, Deputy Director, NSO (FOD), Shillong, u la pynleit jingmut halor ka jingdonkam ban pynsngewthuh paidbah ïa ka jingnang jingstad ha ka jingkheiñ jingdiah. U la ong ba ka jingïaid lynti kaba 75 snem jong ka NSS ka la nohsynniang sha ki sienjam wanrah jingkylla kum ka New Education Policy (NEP) bad ka jingpynwandur ïa ka National Indicator Framework na ka bynta ki United Nations Sustainable Development Goals (SDGs).
Da kaba ai jingtip shuh shuh, u Bah S. Nongkynrih, Junior Statistical Officer, u la ban jur ïa ka jingdonkam jong ka rukom treikam kaba bha ha kaba lum ïa ki jingtip kiba lah ban shaniah na ka bynta ban pyndonkam ha ka ri bad ha ka pyrthei. U la ïasam jingmut bad ki nongtrei ba thymmai halor ki buit lum jingtip kiba treikam.
Ka Kong Ibapynkmen Marweiñ, Survey Supervisor, ka la ïakren halor ki jingmyntoi ba wan na ka kam statistics ha kaba pynwandur ïa ki skhim ba kyrpang kum ka MGNREGA, ka Jal Jeevan Mission, bad ka Ayushman Bharat. Ka la pynshlur ïa ki nongtrei ha ki jaka ban sngew sarong ïa ki kam jong ki kum ki nongnoh synñiang ba kongsan sha ka polisi jong ka India, wat hapdeng ki jingeh ha ka jinglum jingtip ha ki jaka nongkyndong.
Ïa kane ka jingïalang la pynkut da ka jingïakop kylli jingkylli, kaba la saiñdur ban pynkhlaiñ ïa ka jingtip shaphang ki jingkheiñ jingdiah bad ban kyntiew ïa ka jingïashim bynta shitrhem hapdeng ki ophisar bad ki nongtrei.