Jowai, Nailar 24: Mynta ka sngi ka National People Party West Jaiñtia Hills District kala rakhe ïa ka jingdap 10 snem jong ka jingïaid lynti naduh bala seng ïa ka National People Party (NPP) hapoh ka ri ha ka jingïalang kaba la long ha Cafe Central, Mooralong -Jowai.
Na ka liang u President ka NPP West Jaiñtia Hills u MLA ma Wailadmiki Shylla haka jingkren sha ki lad pathai khubor ula ong ba ka Party kala rakhe khnang ïa kane ka sngi mynta ka sngi 24 tarik Nailar kaba dei ka sngi seng ïa ka.
Ki nongïalam ka Party napoh ka West Jaiñtia Hill kila wan sha kane ka jingïalang kiba kynthup lang naduh ki Prisident ki Secretary bad ki dkhot na ki Block, ki Unit bapher bapher.
Ïa ka jingïalang la pynïaid da u General Secretary bam D, Kharjana, la ioh ka jingduwai na u ma H. Pohthmi (MDC), ka jingpynsngew ia ka jingiaid lynti ka seng na u F. Nongbri (NPYF State General Secretary), ka jingkren na u ma Thombor Shiwat CEM ka JHADC, ka kong D. Rymbai President Women Wing Jowai Block bad ki kyntien ai khublei na u Bormi Lyngdoh (NPYF District President).
U ma Wailadmiki Shylla haba kren sha ki lad pathai khubor ula ong ba kane ka Party la seng ïa ka ha nongbah Jowai bad mynta ka la ïaid shakhmat ha ka rukom treikam na ka bynta u paidbah, lyngba ka jingtrei shitom jong u National President u Conrad K. Sangma uba dei ruh u Myntri Rangbah ka Jylla hapoh ka jingïalam jong u ka rukom treikam kala ïapher bha haba ïa nujor bad ki sorkar ba la dep.
Ha kaba ïadei bad ka kam khappud u ma Wailad ula pynsngew ba ka sorkar mynta kala lah ban pynbeit ïa kane ka kam kaba la sahteng la kumba 50 snem, na ka liang ka sorkar ruh kala dep ban ïasoh ïa ka MoU ban pynbeit ïa u pud u sam jong ki ar jylla ka Assam bad Meghalaya haka Phase kaba nyngkong bad ha kine ki khyndiat sngi yn sa pyndep sa ka pahase kaba Ar.
Ha kaba ïadei bad ka kam pynroi bad ki project ba rim kiba dang sahteng, u la pynsngew ba ïa ka project sam umbam ha Jowai ruh ka sorkar kala dep ban pyndep ïa kane dang ha kine ki khyndiat bnai, katba ïa ka Iawmusiang ka dang sahteng haduh mynta na ka daw ka jingdkoh treikam jong u Contractor haduh ba kane kala poi sha ka ïing bishar.
Haba kylli na u MLA ha kaba ïadei bad ka jingslem ban plie paidbah ïa ka Maternity and Child Hospital (MCH) kaba don ha Panaliar Jowai, ula pyntip na daw jong ka jingwan lyngshop jong ka khlam Covid-19 ïa kane ka jaka sumar ïa ki longkmie bad khynnah la hap ban pynkylla shipor kum ka Covid Center bad kyrmen hapoh jong une hi u snem ma u ryngkat bad u Myntri Rangbah kin wan ban plie noh ïa katei ka Maternity and Child Hospital (MCH).
