Nongstoiñ, Nailur 25: Ka Nongstoiñ College Nongstoiñ ha ka sngi nyngkong, ka la ïoh ban pynlong ïa ka Graduation Day jong ka College na ka bynta u snem 2023 bad pynkup burom ruh ïa ki saw ngut ki samla pule kiba dei ki Merit holders jong ka College, ba kynthup ïa I Ibajanai Lyngdoh I ba la ïoh 4th position ha ka Zoology, u Kosphalan Lyngkhoi, 6th position ha ka Zoology, Pynshaitbor Thongni 6th Position ha ka Chemistry bad I Pynishisha Wanniang 10th Position ha ka Political Science.
Ha kajuh katei ka sngi la ïoh ruh ban plie ïa ki ar tylli ki building ba thymmai jong ka College ba kynthup ïa ka Commerce building bad ka Girls Hostel, ha kaba u Myntri ka tnad pule puthi jong ka sorkar jylla u Rakkam A.Sangma u la long u kongsan, ha ryngkat ka jingïadonlang jong u bah H.M.Shangpliang nongai buit ha ka tnad pule puthi ka sorkar Jylla kum u symbud kongsan.
Kiwei ki long u DC ka West Khasi Hills Bah Garod LSN Dykes, u MLA barim ka Nongstoiñ bad President ka Governing Body jong ka Nongstoiñ College u bah Macmillan Byrsat, u Dr L.L Mawsor Secretary Governing Body, I Dr I.Mawthoh Principal ka Nongstoiñ College, ki Principal na kiwei pat ki skul, ki dkhot ka Governing bad Sponsoring Body, ki nonghikai, ki khynnah bad kiwei.
Na ka liang jong u kongsan u la aiti ruh ïa ki mementoes sha baroh kito kiba la pyndep ïa ka Graduate jong u snem 2023 ba kynthup ha ka Art Stream, Commerce Stream bad Science Stream.
Lai ngut ki nonghikai jong ka College ba kynthup ïa I Dr.Mrs Kyntiewhunlang Lyngkhoi, Dr Skhemborlin Wahlang bad Dr. Rishababiang Lyngdoh Nonglait, ki la ïoh ïa ka jingpynkup burom ba kyrpang namar ka jingïoh jong ki ban pyndep ïa ka kyrdan Doctorate Degree.
Shuh shuh, na ka liang jong u kongsan u la aiti ruh ïa ki memento sha ki dkhot ba nyngkong jong ka Sponsoring Body jong ka College ba kynthup ïa u Bah Naiñtarsing Nongrem, u Bah Semsing Dkhar (Bam kwai ha dwar u Blei), u Bah Permanent Syiem bad u Paiem E.P.Syiem, Syiem ka Hima Nongstoiñ.
Katkum ka jingïathuh jong I Principal, la ong ba ha kine ki 3 snem kiba la dep, ka jingpass jong ki samla pule ka long 100 percent ha ka Science bad Commerce stream bad 96 percent ha ka Art Stream.
