Mawlai, Nailar 25: Kum shi bynta rakhe ïa ka National Sports Day na ka liang jong ka Mawlai Grassroots Centre ha ryngkat bad ka Mawlai Sports Club ki la ïasnohktilang ban pynlong ïa ka program ïalehkai phutbol bad kilanmet na ka bynta ki khynnah hynne ka Sngi Thohdieng, ha Mini Stadium, Mawlai, Phudmuri.
Kumban shu pynkynmaw, na ka liang jong ka sorkar sorkar jylla Meghalaya ka la pynbna ïa ka taïew jinglehkai Sports bad kilanmet ha ka jylla naduh ka 22 tarik haduh 29 tarik, Nailar, kum shi bynta ban rakhe ïa ka National Sports Day.
Ha kane ka sngi ba ka Mawlai Grassroots Centre lem bad ka Mawlai Sports Club ka la pynlong ïa ka prokram lehkai na ka bynta ki khynnah la ïa don ryngkatlang bad u Bah B. Lyngdoh, u ba dei u Football Secretary ka Mawlai Sports Club ryngkat ruh bad ki dkhot jong ka klob.
ïa kane ka prokram kilanmet la pynlong ha ka por 3 shiteng nohphaisngi bad ki la don haduh 94 ngut ki khynnah kiba la wan ban ïashimbynta.
