Shillong, Jylliew: Ka Indian Institute of Professional Studies (IIPS) ha ryngkat ka jingïatreilang bad ka NOMADS adventure Shillong kumjuh bad ka Shillong Municipal Board ki la rakhe ïa ka sngi pynneh pynsah Mariang ha ka pyrthei ne “World Environment Day” ha ka 5 tarik mynta u bnai lyngba ka theme “PLOGGING” kata kaba kynthup ha kajuh ka por ïa ka rukom ïalehkai sport bad ka jingtam ïa ki ñiut ki ñier.
Ha kane ka prokram ki khynnah pule la ïohi katba ki dang pynlong ïa ka jingïaid kjat ne jogging lyngba ka lynti surok na Dhankheti -Barik sha State Central Library bad Meghalaya High Court bad pynkut ha Police Bazaar da kaba tam ryngkat ruh ïa ki ñiut ki ñier ha lynter ka lynti surok.
Hadien ba la lum ïa kine ki ñiut ki ñier la pynïakhlad ïa ki hapdeng kiba pyut bad ki bym pyut ïa kiba la pynkit noh da ki dkhot jong ka tnat Shillong Municipal Board.
