Shillong, Nailur, 21: Ka seng kieng atiar ba la shah kheiñ be-aiñ Hynñiewtrep National Liberation Council (HNLC) ha ka sngi Palei ka la rakhe ïa ka ‘martyr’s day’ kum ka jingai burom ïa ki nongïalam bad ïa ki dkhot ba ehrang jong ka seng kiba la len lade ban ïakhun pyrshah ïa ka jingdakhol jubor bad ka jingshah khñiot beiñ ha ka India.
Ha u kyrwoh ba la phah sha ki lad pathai khubor, u General Secretary cum Publicity Secretary jong ka HNLC u Bah Saiñkupar Nongtraw u la ong ba u Sambor Mawthoh ba ju khot sin u Dengdeng u la don ha ka jaka kaba kongsan tam ha ka pakit ki mynnor jong ka HNLC.
U la duhei ïa la ka jingim kum u dkhot jong ka HNLC ha ka jingïather kuli bad ki pulit ka Meghalaya ha ka 21 tarik, Nailur, 1994 ha Jaïaw. Kum ka jingithuh ïa ka jinglenlade jong u, ka HNLC ka la pynbna ïa kane ka sngi kum ka Martyrs’ Day jong ka seng, ong u Bah Nongtraw.
U la ong ba ka HNLC ka ju buh jingthoh ïa baroh ki dkhot bad ïa ki nongïalam kiba la aiti lut ïa la ka jong ka jingim na ka bynta dawbah ka ‘ri Hynñiewtrep.
“Ka snam ba la phlei na kine ki samla kiba shlur kam shym la long lehnohei, kumba ka HNLC ka angnud ban pynthikna ba ka jingïakhun jong ngi kan long shi bynta jong ka histori,” ong u General Secretary bad bynrap, “kane ka sngi bakongsan ka dei ka jingrakhe bad ka jingaiburom ïa ki nongïalam bashlur bad ïa ki dkhot kiba la len lade ha ka jingïakhun ba khlem shongthait pyrshah ïa ka jingdakhol bad ka jingkhñiot beiñ ka India. Ka dei ka sngi kaba kyrpang ban ai burom ïa kito kiba ïakhun khlem jingsheptieng na ka bynta ka hok bad ka jingangnud jong ki briew jong ki. Ka jingaiti bakhlaiñ, ka jinglen lade bad ka jingïakhun ba khlem thait ban wad ïa ka hok bad ka jinglaitluid. Ha kane ka sngi, ngi shim ïa kane ka khyllipmat ban kynmaw burom ïa ka jinglen lade jong ki bad ngi pynpaw ruh ka jingsngewnguh shikatdei ei na ka bynta ka jingaiti lut bad ka jingshlur jong ki.”
U Bah Nongtraw u la ong ruh ba ka jingpynkha ïa ka HNLC la pynshong nongrim halor ki hok jong ka pakit ki mynnor. “Bun ngut ki samla ki la pynïasoh bad ka HNLC, kiba la pynkhreh ban thoh biang sa shisien ïa ka Histori,” u la ong.
U la ong ba kam pat ju don kano kano ka jingïakhih ba khlem ïaumsnam ha ka histori. Katkum ka jingong jong u, ka jingïakhih ba khlem ïaumsnam kan ym treikam daleilei lymda ki nongkhñoit beiñ kim don ïa ka mynsiem ïatiplem.
“Ai ba mynsiem jong kito ki khlawait ba la khladnoh kin ïoh ïa ka jingjahthait bymjukut, bad ai ba ka kyrteng jong ki kan nang ïai bteng ban ai mynsiem ïa ki pateng ki ban sa wan ban ieng pyrshah ïa ka jingshah leh bym hok bad ka jingshah khñoit beiñ. Ka jingrakhe ïa ka Martyrs Day ka pynkynmaw biang ïa ka kam kaba ki la leh, ka kyntu ïa ngi ban pyntyllun shakhmat ïa ki jingangnud jong ngi bad ban ym kyrkieh ban kthong ïa ka hok bad ka jinglaitluid na ka bynta ka ri Hynñiewtrep,” ong u Bah Nongtraw.
